काठमाडौं । राष्ट्रिय सुरक्षा नीति २०७३ संशोधन र परिमार्जनको प्रस्ताव तयार गर्न उच्चस्तरीय समितिले राष्ट्रिय सुरक्षा नीति २०७५ को मस्यौदा प्रतिवेदन प्रधानमन्त्रीसमक्ष बुझाएको छ । सोमबार प्रधानमन्त्री निबास बालुवाटारमा राष्ट्रिय सुरक्षा परिषद्का अध्यक्ष समेत रहेका प्रधानमन्त्री केपी शर्मा ओलीलाई समितिले प्रतिवेदन बुझाएको हो । प्रतिवेदन बुझाउदै उपप्रधान एवं रक्षामन्त्री इश्वर पोखरेलले कार्ययोजना बनाएर नै संसोधन र परिमार्जनको प्रतिवेदन तयार गरेको जानकारी दिए ।
उनले २८० स्थानमा पत्राचार गरि लिखित सुझाव मागीएको र प्रतिवेदनमा आवश्यक सुझाव राखिएको बताए । उनले परिमार्जित सुरक्षा नीति २०७५ को कार्यान्वयन भएपछि नेपालको बृहत सुरक्षा व्यवस्था सुदृढ हुने र समृद्ध नेपाल सुखी नेपालीको सपना साकार पार्न सहयोग पुग्ने विश्वास व्यक्त गरे ।
समितिले बुझाएको प्रतिवेदन ८ भागमा बिभाजन गरिएको छ । नेपालको संविधानमा नेपालको समग्र राष्ट्रिय हित, सुरक्षा र प्रतिरक्षासम्बन्धी नीति तर्जुमा गर्न तथा नेपाली सेनाको परिचालन वा नियन्त्रण गर्नका लागि मन्त्रिपरिषद्लाई सिफारिश गर्न प्रधानमन्त्रीको अध्यक्षतामा राष्ट्रिय सुरक्षा परिषद् रहने व्यवस्था रहेको छ । यसअघि सरकारले राष्ट्रिय सुरक्षा नीति २०७३ संसोधनका लागी रक्षामन्त्री पोखरेलको संयोजकत्वमा समिति गठन गरेको थियो ।
