काठमाडौं । स्वतन्त्र मधेस गठबन्धनका नेता सीके राउत सरकार र आफ्नो संगठनबीच भएको सहमति ऐतिहासिक भएको बताएका छन् । शुक्रबार आज काठमाडौँमा भएको राजनीतिक सहमति घोषणा कार्यक्रमलाई सम्बोधन गर्दै डा.राउतले सो कुरा बताएका हुन् ।
’विगत केही वर्षदेखि विकारल समस्याले हामी पनि चितिन्त थियौं । कुन रुप लेला भन्ने हामीमा चिन्ता थियो,’ उनले भने, ‘अब सहज अवतरण भएको छ । सबैका लागि ऐतिहासिक समय हो ।’
डा. राउतले आफूहरु बुद्धका सन्तान भएको भन्दै राउतले अहिंसा शरीरभित्र अन्तरनिहित रहेको बताए । राउतले भने, ‘हामी बुद्धका सन्तान हौं, अहिंसा हाम्रो रगरगमा बसेको छ ।’ हिंसात्मक आन्दोलन गर्न सजिलो भए पनि गर्न नहुने भन्दै त्यस्ता गतिविधिमा नलाग्न अन्य पक्षलाई आह्वानसमेत गरे ।
‘हामीले हिंसात्मक आन्दोलन गरेर समय खेर फाल्ने बेला होइन । जनताले चाहेपनि जे पनि हासिल गर्न सक्छ । वार्तामार्फत राज्यले प्रतिबद्धता पनि जनाएको छ । सबै शक्ति जनताको हातमा निहित रहेको छ । जस्तो व्यवस्था ल्याउन छ, त्यसका लागि अभिमत प्रयोग गरुन् । समग्र देशको विकास हासिल गर्ने बेला आएको छ ।’
२०६९ साल जेठ सात गते काठमाडौँमा पत्रकार सम्मेलन गरेर आन्दोलनको घोषणा गरेको स्मरण गर्दै उनले भने, ‘त्यसबेलाका मन्त्रीहरुले पनि आन्दोलनको संवेदनालाई सम्मान गर्नुभयो । बल प्रयोग गर्नुभएन । जसले गर्दा आन्दोलनले नकारात्मक मोड लिएन ।’
यसअघिका प्रधानमन्त्री, शेरबहादुर देउवा, सुशील कोइराला, पुष्पकमल दाहाल, डा। बाबुराम भट्टराई पनि धन्यवादका पात्र भएको राउतले जिकिर गरे ।
राज्य पक्षले जनतामा निहित रहेको सम्प्रभुतालाई स्वीकार गर्दै आफूलाई राजनीतिक स्पेश प्रदान गरेको बताउँदै राउतले भने, ‘जनता नै सर्वोपरी हो । यो राज्यको पनि जीत हो । जताको पनि जित हो । कसैले पनि अनर्थ नलगाउन अनुरोध गर्दछु ।’
