प्रधानमन्त्री ओलीले दुईदिनका लागी काठमाडौं छोडे

काठमाडौं । प्रधानमन्त्री केपी शर्मा ओलीले दुई दिनका लागी काठमार्डौं छोडेका छन् । प्रधानमन्त्री ओलीले जिल्लाहरुमा आयोजना हुने विभिन्न कार्यक्रममा सहभागी हुन दुई दिन काठमाडौं छोडेका हुन् ।

दुईदिने झापा र मोरङ भ्रमणमा जानका लागी उनी आज त्यसतर्फ प्रस्थान गरेका छन् । दुईदिने झापा–मोरङ बसाइका क्रममा प्रधानमन्त्री ओलीले मोरङको उर्लाबारी नगरपालिकास्थित मदन भण्डारी स्मृति प्रतिष्ठानमा इञ्जिनीयरिङ कलेजको उद्घाटन, मदन भण्डारी स्मृति प्रतिष्ठानको रजतजयन्ती स्तम्भ अनावरण र प्रतिष्ठानको साधारणसभाको उद्घाटन गर्ने कार्यक्रम रहेको छ ।

त्यस्तै उनले आजै अपराह्न आयोजना हुने दमक नगरपालिका परिसरमा प्रदेश नं १ स्तरीय साहित्यिक गोष्ठीको उद्घाटन गर्नुका साथै मदन भण्डारी रङ्गशालासम्बन्धी छलफलमा सहभागी हुने कार्यक्रम रहेको छ ।

भ्रमणका क्रममा प्रधानमन्त्रीले आजै गौरादह र दमक नगरपालिकाका जनप्रतिनिधिहरुसँग पनि भेटघाट एवं छलफल गर्ने छन् । उनले भोलि बिहान दमक रेडक्रस हलमा आयोजना हुने नगर र वडा कमिटीको शपथ तथा प्रशिक्षण कार्यक्रममा र दमकमा निर्माण भएको पशुपक्षी हाटको उद्घाटन गर्ने कार्यक्रम रहेछ ।

साथै भोलि दिउँसो भारतीय राजदूतावासले बनाइदिएको गौरादह नगरपालिकास्थित स्कुलचौन माविको भवन उद्घाटन र हस्तान्तरण कार्यक्रममा पनि उनको सहभागिता रहनेछ । यी सबै कार्यक्रम सकेर भोलि नै प्रधानमन्त्री ओली भद्रपुरबाट काठमाडौं फर्कने कार्यक्रम रहेको उनको सचिवालयले जनाएको छ ।