आयातमुखी अर्थतन्त्र :- नौ महिनामा व्यापारघाटा २२ प्रतिशतले बृद्धि

काठमाडौं । आयातमा भारी बृद्धि तथा निर्यातमा सानो बृद्धिका कारण मुलुकको वस्तु व्यापारमा व्यापार घाटा बढ्ने क्रममा विश्राम आउने कुनै संकेत देखिएको छैन ।

परिणामस्वरुप चालु आर्थिक वर्षको प्रथम नौ महिनामा मुलुकको वस्तु व्यापारतर्फको व्यापारघाटा रु. ९९१.८ अर्ब पुगेको छ जुन अघिल्लो आर्थिक वर्षको सोही अवधिको तुलनामा करिव २२ प्रतिशतले बढी हो । यता मुलुकको आयातमा पनि २२ प्रतिशतको फराकिलो बृद्धिसहित चालु आर्थिक वर्षको प्रथम नौ महिनामा मुुलुकको वस्तु व्यापारतर्फको आयात रु १०६१.६ अर्ब पुगेको छ । समीक्षा उता निर्यातमा भने करिव १७ प्रतिशतको मात्र वृद्धिका साथ कुल वस्तु निर्यात रु. ६९.८ अर्बमा सीमित रहन गएको छ ।

समीक्षा अवधिमा मुुलुकको वस्तु तर्फको कुल वैदेशिक व्यापारमा २१ प्रतिशतको वृद्धिसहित रु. ११३१.४ अर्ब पुगेको छ । निर्यातको बाँस्केट सानो हुुनु, निर्यातको आकार पनि सानो हुुनु, मुलुकभित्र उत्पादनको वातावरण सिर्जना नहुनु र रेमिट्यान्स सिर्जित मागमा बृद्धि हुनुका कारण मुलुकको व्यापारघाटा दिनानुदिन भयावह हुँदै गएको हो ।

यता समीक्षा अवधिमा आयात निर्यात अनुपात १ः१५ पुगेको छ जबकि अघिल्लो आर्थिक वर्षमा सो अनुपात १ः१४.५ मा मात्र सीमित रहेको थियो । गत आर्थिक वर्षको सोही अवधिमा कुल व्यापारमा निर्यातको हिस्सा ६.४ प्रतिशत रहेकोमा चालु आर्थिक वर्षको सोही अवधिमा कुल व्यापारमा निर्यातको हिस्सा ६ प्रतिशतमा सीमित रहन गएको छ ।

गत आर्थिक वर्षको प्रथम नौ महिनामा कुल व्यापारमा आयातको हिस्सा ९३.६ प्रतिशत रहेकोमा चालु आर्थिक वर्षको सोही अवधिमा कुल व्यापारमा आयातको हिस्सा ९४ प्रतिशत पुगेको छ । यो आँकडाले देश क्रमशः आयातमुखी हुँदै गएको संकेत गर्दछ ।