यती एयरलायन्सको अध्यक्षमा लाक्पा, प्रबन्ध निर्देशकमा चन्दा, अर्को विमान भित्र्याउने तयारी

काठमाडौं । यती एयरलायन्सको प्रबन्ध निर्देशकमा चन्दा शेर्पा र कार्यकारी अध्यक्षमा लाक्पा सोनाम शेर्पा नियुक्त भएका छन् । एयरलायन्सका प्रबन्ध निर्देशक आङछिरिङ शेर्पाको निधनपछि पत्नी चन्दा नियुक्त भएकी हुन् ।

पर्यटनमन्त्री रवीन्द्र अधिकारीसहित ७ जना सवार हेलिकप्टर दुर्घटनामा आङछिरिङको गत फागुन १५ गते ताप्लेजुङमा निधन भएको थियो ।

चन्दा यति एडभेञ्चरकी पनि प्रमुख हुन् । अध्यक्ष लाक्पा सोनाम शेर्पा आङछिरिङका दाइ हुन्। कम्पनीको उपप्रबन्ध निर्देशमा नोर्बुछिरिङ शेर्पा, समूहको कार्यकारी निर्देशकमा विजयबहादुर श्रेष्ठ, प्रमुख कार्यकारी अधिकृतमा उमेशचन्द्र राई र आर्थिक निर्देशकमा अनोज रिमाललाई नियुक्त गरेको छ।

यतीसँग हाल एटिआर ७२–५०० चार र जेटस्ट्रिम–४१ सिरिजका पाँच थान जहाज छन् । अर्को कम्पनी तारा एअरका २ वटा डोर्नियर डिओ २२८ र चार वटा डिएचसी, ६ ट्विनअटर विमान छन् । कम्पनीले अर्को एउटा एटिआर विमान भित्र्याउँने तयारी गरिरहेको छ ।