उपप्रमुख खड्गी नर्भिक अस्पताल भर्ना, स्वास्थ्य सामान्य

काठमाडौं । काठमाडौं महानगरपालिकाकि उपप्रमुख हरिप्रभा खड्गी श्रेष्ठको स्वास्थ्य अवस्था सामान्य रहेको अस्पतालले जनाएको छ ।उनको स्वास्थ्यमा समस्या आएपछि बिहीबार थापाथलीस्थित नर्भिक अस्पताल भर्ना गरिएको थियो ।

उपप्रमुख खड्गीको अवस्था सामान्य रहेको नर्भिक अस्पतालका कर्पोरेट कम्युनिकेसन उप–महाप्रवन्धक आरपी मैनालीले जानकारी दिए ।उनले भने, “छातीमा समस्या देखिएपछि  ‘उपप्रमुख खड्गी’ अस्पताल भर्ना भएकी हुन्।

अहिले खतरामुक्त अवस्थामा सीसीयुमा छिन, शनिबार वा आइतबार घर फर्किने अस्पताल स्रोतले जनाएको छ।” खड्गीलाई हृदयघातको आशङ्का गरिए पनि उनको एनजीओग्राफी गर्दा त्यस्तो लक्ष्यण नभेटिएको अस्पतालले जनाएको छ ।

राष्ट्रियसभा गृहमा आउँदो आर्थिक वर्षका लागि बजेट तयारीबारे भएको बैठकमा सहभागी भएकी उपप्रमुख खड्गीले शारीरिक रुपमा असजिलो महसुस गरेपछि अस्पताल लगिएको महानगरपालिकाले जनाएको छ ।

अस्पतालले प्रारम्भिक स्वास्थ्य परीक्षणका क्रममा २४ घण्टा चिकित्सकको निगरानीमा रहन भनेपछि अस्पतालमा भर्ना गरिएको थियो । लगत्तै महानागरपालिकाका प्रमुख विद्यासुन्दर शाक्यले अस्पताल पुगेर उपप्रमुख खड्गीको स्वास्थ्य अवस्थाका विषयमा जानकारी लिएका थिए ।