माधव नेपालका भान्जा सेञ्चुरी बैंकको डेपुटी सीईओमा बढुवा, एकैचोटी पाँच तहको छलाङ

काठमाडौं । डेपुटी सीईओ जीवन भट्टराईले राजिनामा दिएको एक साता पनि नपुग्दै सेञ्चुरी कर्मसियल बैंकले मनोज न्यौपानेलाई नयाँ डेपुटी सीईओको रुपमा नियुक्त गरेको छ ।

दुईबर्ष अघिमात्र सनराइज बैंकको म्यानेजर पद छोडेर सेञ्चुरी बैंक भित्रिएका न्यौपाने चिफ बिजनेश अफिसर थिए ।एजीएम सरहको सो पदमा काम गरेका उनलाई बैंक सञ्चालक समितिले एकै पटक पाँच तह माथि बढुवा गदै डेपुटी सीईओमा नियुक्त गरेको हो । उनी भन्दा सिनियर सोही बैंककी चिफ रिस्क अफिसर अनुपमा श्रेष्ठ मानन्धरलाई पछि पार्दै न्यौपानेले छलाङ मारेका हुन् ।

नवनियुक्त डेपुटी सीईओ न्यौपाने सत्तारुढ नेकपाका वरिष्ठ नेता माधव नेपालका भान्जा हुन् । बैंकिङमा खासै लामो अनुभव नभएतापनि उनी दक्ष बैंकर भने भएको बताइन्छ । सेञ्चुरीमा डीजीएम, जीएम, एसीईओका पदहरु लामो समयदेखि खाली छन् ।

पूर्व एमाले सर्मथक संस्थापक शेयरहोल्डरहरुको बाहुल्यता भएको सेञ्चुरी बैंकमा अर्थमन्त्री युवराज खतिवडा र डेपुटी गर्भनर चिन्तामणि शिवाकोटीको जोडबलमा न्यौपानेलाई एकैचोटी पाँच तह माथि जम्प गराइएको हुनसक्ने अनुमान बैंकिङ क्षेत्रमा गरिएको छ ।