प्रधानमन्त्री ओलीको उपचार शुरु, महिना दिनसम्म बसाई हुने

८ भदौ, काठमाडौं । उपचारका लागि सिंगापुर पुगेका प्रधानमन्त्री खड्गप्रसाद ओलीको स्वास्थ परिक्षण थालिएको छ । प्रधानमन्त्रीका निजी चिकित्सक डा. दिव्यासिंह शाहका अनुसार अहिले प्लाज्मा फेरिसिस प्रकृयाबाट उपचार शुरु भएको छ । डा. शाहका अनुसार यो प्रकृया सात पटकसम्म गर्नुपर्ने हुनसक्छ । प्रधानमन्त्रीको सचिवालयले पनि यस कुरालाई प्रष्ट्याएको छ । प्लाज्मा फेरिसिस प्रकृयाले मृगौलामा बढेको एन्टीवडी घटाउने काम गर्छ । ओलीको मृगौला १३ वर्ष अघि फेरिएको हो । अहिले सो मृगौलाले एन्टीवडी उत्पादन गर्न थालेको छ । त्यसलाई घटाउन सात पटकसम्म प्लाज्मा फेरिसिस प्रकृया अपनाउने पर्ने हुनसक्छ ।

दिन बिराएर मात्रै प्लाज्मा फेरिसिस गर्नुपर्ने हुँदा प्रधानमन्त्री ओलीको बसाई एक महिना पनि नाघ्ने अनुमान गरिएको छ । ओलीको उपचार सिंगापुरस्थित नेशलन युनिभर्सिटी अस्पतालमा भइरहेको छ । ओलीको उपचार सुरु भएको पुष्टि उनका राजनीतिक सल्लाहकार विष्णु रिमालले पनि ट्वीटमार्फत गरेका छन् । नेपालको इतिहास मै संभावत:  यति लामो समय सत्तारुढ प्रधानमन्त्री विदेशमा बसेर उपचार गराउनेमा ओली पहिलो भएका छन् । उपचार प्रकृया लामो हुने बुझेर नै ओली सिंगापुर प्रस्थान गर्नु अघि मन्त्रिपरिषद बैठक राखी भिडियो कन्फरेन्समार्फत क्याबिनेट बैठक गर्न मिल्ने निर्णय गराएका छन् ।