मिडिया काउन्सिल विधेयक फेरि राष्ट्रियसभामा पेश हुँदै

१२ भदौं,काठमाडौं । बहुचर्चित तथा विवादित मिडिया काउन्सिल विधेयक आज फेरि राष्ट्रिय सभाको बैठकमा पेश हुँदैछ ।

गएको बैशाख २६ गते सरकारले एकपक्षीय रुपमा राष्ट्रिय सभामा उक्त विधेयक दर्ता गराएको थियो । सरोकारवाला पक्षसँग बिना छलफल विधेयक अघि बढाइएपछि नेपाल पत्रकार महासंघको नेतृत्वमा आन्दोलन चर्किएको थियो ।

आन्दोलनले भयानक स्वरुप लिने छाँट देखिएपछि सरकारले प्रक्रिया स्थगित गरेको थियो । महासंघको आन्दोलनले नागरिक समाजलाई समेत तताएका कारण सरकार पछि हट्न बाध्य भएको थियो ।

नेपाल कम्युनिष्ट पार्टीका शीर्ष नेतृत्वसँग भएको छलफलपछि महासंघले आन्दोलन स्थगित गरेको हो । राष्ट्रिय सभाका अध्यक्ष गणेश तिम्सिनाको पहलमा संसदका पदाधिकारी एवं महासंघ पदाधिकारी तथा सञ्चार तथा सूचना प्रविधि मन्त्रीबीच केही समझदारी बनेकाले विधेयक पुनः पेश गरिएको छ ।

महासंघका अध्यक्ष गोविन्द आचार्यले दिएको जानकारी अनुसार, राष्ट्रियसभाका अध्यक्ष, उपाध्यक्ष, समिति सभापति , प्रमुख प्रतिपक्षी दल नेपाली कांग्रेसका प्रमुख सचेतकसमेतको सहमतिमा विधेयकमा संशोधन गरिने छ ।

प्रस्तावित विधेयकमा मिडिया काउन्सिल गठन प्रक्रिया, स्वायत्तता, संरचना र प्रेस स्वतन्त्रता र दण्डजरिवाना जस्ता संवेदनशील विषय विवादित थिए । अहिले भने अध्यक्ष तिम्सिनाको पहलमा सञ्चार मन्त्री महासंघले उठाएका तीनवटा विषयमा संशोधन गर्न सहमत भएकाले महासंघले विधेयक अघि बढाउन सहमति दिइएको बताइएको छ ।

ती तीन बुँदामा मिडियाको स्वायत्तता, गठन र कारबाहीका विषयमा संशोधन गर्न सरकार तयार भएको महासंघका सभापति आचार्यले जानकारी दिएका छन् ।

अब मिडियाको स्वायत्तता र स्वतन्त्रताका विषयमा सरकारी हस्तक्षेप नहुने गरी संशोधन गरिने छ , आचार्यले भने – साथै काउन्सिल गठन गर्दा सरकार भन्दा बाहिरका मानिसको संलग्नता हुने छ । जरिवानाका सन्दर्भमा समेत अब विधेयकले संशोधन गर्ने सहमति भएको उनले बताए ।