ठूलै षडयन्त्रका लागि बामदेव पनि सिंगापुर उड्दै,शनिबार मात्र फर्किने तयारी

१८ भदौ, काठमाडौं । आन्तरिक रुपमा चरम विवादमा फसेको नेकपा भित्रको आगामी कार्यदिशा तयार गर्न प्रधानमन्त्री खड्गप्रसाद ओलीले आफू निकटस्थहरुलाई धमाधम सिंगापुर बोलाउन थालेका छन् । मृगौला रोगबाट पीडित ओली हाल सिंगापुरमा उपचार गराईरहेका छन् ।

सिंगापुर उड्नु अघि सरकारी निवास बालुवाटारमा बसेको नेकपा सचिवालय वैठकमा अर्का नेता माधवकुमार नेपालसँग चर्काचर्की परेको थियो । यो घटनाबाट चिढिएका ओली उपचार पूरा गरी शनिबार स्वदेश फर्कने तयारीमा छन् । तर काठमाडौं आउनु अघि नै उनले आफू निकट नेतालाई सिंगापुर बोलाएर भावी रणनीति तयार गर्न लागेको स्रोतको दावी छ ।

ओलीको बोलावट आएपछि नेता बामदेव गौतम आज दिउँसो सिल्क एयरको उडानबाट सिंगापुर जाँदै छन् । यसअघि हिजो मात्रै पार्टी महासचिव विष्णु पौडेल सिंगापुर पुगिसकेका छन् । बामदेव र पौडेल हिजै सिंगापुर जाने तयारीमा रहेपनि पुष्पकमल दाहालको अनुरोधमा बामदेव भने रोकिएका थिए । तर आज बिहान ओली आफैंले बामदेवलाई फोन गरी सिंगापुर डाकेकाले जान लागेको स्रोत बताउँछ ।

बामदेवलाई समेत सिंगापुर बोलाएकाले ठूलै तयारी गर्न लागेको हुनसक्ने अनुमान गरिएको छ । ओलीको पछिल्लो रणनीतिलाई नेपाल पक्षले भने सशंकित रुपमा हेरेको छ । नेपाल निकट एकजना नेताले भनेका छन् –ओलीका हनुमानहरु स्वास्थलाभ गर्न मात्र सिंगापुर गएको जस्तो लाग्दैन । ठूलै षडयन्त्रका लागि ओलीले आफ्ना विश्वास पात्रलाई बोलाएको हुनसक्ने आशंका उनले व्यक्त गरेका छन् ।

प्रधानमन्त्री ओलीको स्वभाव गोमन सर्पको जस्तो छ , बढो इखालु छन् उनले भने – माधव कम्रेडलाई तह लगाउने रणनीति तयार गर्न सिंगापुरमा बामदेवलाई बोलाएको जस्तो लाग्छ । तर यसले केही फरक पर्नेवाला छैन । आज विहानै ओलीको फोन आएपछि बामदेवले प्रचण्डलाई जानकारी गराएका थिए । यसबारे ओलीले प्रचण्डलाई भने कुनै जानकारी दिएका छैनन् ।

यसले गर्दा प्रचण्ड समेत ओलीको कार्यशैलीप्रति गम्भिर बनेका छन् । शनिबार काठमाडौं आउने तयारी गरेका ओलीले आफू अनुकुल वातावरण बनाउन जस्तो सुकै जोखिम उठाउन सक्ने बताइन्छ । सिंगापुरको नेशनल युनिभर्सिटी हस्पिटलमा उपचार गराइरहेका ओलीको बुधबार अन्तिम अर्थात् सातौँ प्लाज्मा फेरिसिस गरिँदैछ। पहिलेको कार्यतालिका अनुसार प्रधानमन्त्री ओली शुक्रबार नेपाल फर्किने भनिए पनि पछिल्लाे कार्यतालिका शनिबारकाे भएकाे हाे  ।