दर्जनौं उजुरी अख्तियार मौन

७ असोज, काठमाडौं । राजधानीबाट मंगलबार प्रकाशित पत्रपत्रिकाले फरक – फरक विषयका समाचारलाई प्राथमिकताका साथ छापेका छन् ।

नागरिक दैनिकमा ‘दर्जनौं उजुरी अख्तियार मौन’ शीर्षकमा समाचार छापिएको छ । जस अनुसार २०५८ सालदेखि नै पर्न थालेका कतिपय उजुरीमा प्रमाणसमेत समावेश गरिएको भएपनि सुरुदेखि नै अख्तियार ललितानिवास जग्गा प्रकरणमा मौन रहेको पाइएको उल्लेख छ ।

समाचार अनुसार ललितानिवासको २ सय ९९ रोपनी जग्गा व्यक्तिले हडपेकोमा लामो समयदेखि मौन रहेको अख्तियार अन्य विभिन्न उजुरीहरुमा पनि मौन रहेको समाचारमा उल्लेख छ ।

यसैगरी पत्रिकाले राजधानीमा जारी नेपाल चीन संयुक्त विचार गोष्ठीबारेको समाचारलाई पनि मुख्य स्थान दिएको छ । समाचारमा प्रधानमन्त्री केपी ओलीले ‘चिनियाँ समाजवाद प्रेरणा’ रहेको बताएको उल्लेख गरे ।

गोरखापत्र दैनिकमा ‘चीन नेपालको विकास साझेदार’ शीर्षकमा प्रमुख समाचार छापिएको छ । प्रधानमन्त्री केपी ओलीले नेपाल -चीन सम्बन्ध स्वार्थ र लेनदेनभन्दा धेरै माथि रहेको उल्लेख गर्दै नेपालले चीनसँग विकास साझेदारी गर्न चाहेको बताए । सत्तारुढ नेकपाका अध्यक्षसमेत रहेका प्रधानमन्त्री ओलीले नेपाल -चीन सम्बन्ध समस्यारहित रहेको प्रष्ट पारेका छन्।

पत्रिकामा उल्लेख भए अनुसार प्रधानमन्त्रीले नेपाल र चीन एक अर्का देशको सार्वभौमिकता र स्वतन्त्रतालाई सम्मान गर्दै अगाडि बढेको बताउँदै मित्रता खुला, स्वतन्त्र र अटल रहेको बताए ।

प्रधानमन्त्रीले बलियो भएर पनि चीनको नीति थिचोमिचो गर्ने नभएको र एकअर्कामा सहयोगको भावना रहेको उल्लेख गरे ।