‘नेपाल अब भूपरिवेष्ठित रहन्न’

२६ असोज, काठमाडौं । चिनियाँ राष्ट्रपतिको २३ वर्षपछि भएको नेपाल भ्रमणले नेपालीमा उत्साह छाएको छ । राजधानीबाट प्रकाशित हुने राष्ट्रियस्तरको पत्रपत्रिकाले चिनियाँ राष्ट्रपति चिनफिनको भ्रमणबारे उत्साहसहितको समाचार प्रकाशित गरेका छन् । पत्रपत्रिकामा राष्ट्रपति सीको भ्रमणबारे फरक फरक शीर्षकमा समाचार प्रकाशित भएको छ ।

गोरखापत्र दैनिक– जनगणतन्त्र चीनका राष्ट्रपति सी चिनफिनको नेपाल भ्रमणले जनस्तरमा समेत अपार उत्साह छाएको छ । राष्ट्रपति सीको भव्य स्वागतका लागि शनिबार अपरान्ह सडकमा लामवद्ध राष्ट्रसेवक कर्मचारी र सर्वसाधारण उत्साहहित रुपमा सहभागी भए ।

राजधानी दैनिक– नेपालले चीनका राष्ट्रपति सी चिनफिङको भ्रमणकाम लागि लामोसमय देखि प्रयास गर्दै आए पनि सफल हुन सकेको थिएन ।

अहिले भने दुई तिहाई बहुमतको शक्तिशाली प्रधानमन्त्री केपी ओलीको अथक प्रयास प्रयास र सबै राजनीतिक दलको सकारात्मक सहयोगका कारण लामो समयदेखि सीलाई नेपाल भ्रमण गराएर विकास र समृद्धिको ढोका खुलाउने नेपाली प्रयासले सार्थकता पाएको छ ।

राष्ट्रपति सीको भ्रमणको क्रममा चीन र नेपालबीच हुने ऐतिहासिक समझदारी नेपालको विकासको लागि कोसेढुंगा सावित हुने विश्वास गरिएको छ ।

अन्नपूर्ण दैनिक– चिनियाँ राष्ट्रपति सी चिनफिङले नेपाललाई अब भूपरिवेष्ठित मुलुकबाट भूजडित मुलुक बनाउन गर्ने प्रतिवद्धता जनाएको छ । सीले उनको सम्मानमा राष्ट्रपति विद्यादेवी भण्डारीले शनिबार आयोजना गरेकाे रात्रिभोजमा त्यस्तो घोषण गर्नुभएको हो ।

कान्तिपुर दैनिक– चिनियाँ राष्ट्रपति सी चिनफिङको सुरक्षासम्बन्धी सम्पूर्ण योजना बलाधिकृत रथी शरदकुमार गिरीको नेतृत्वमा रहेको संयन्त्रले मिलाएको छ ।

सेनाका उपरथी, प्रहरी, सशस्त्र प्रहरी र अनुसन्धान विभागका अधिकारी समेत सम्मिलित संयन्त्रको निर्देशन अनुसार सीको सुरक्षा व्यवस्थापन गरिएको छ ।