दसैँंमा साढे नौ अर्ब ५० करोड बराबरको नयाँ नोट सटही

२७ असोज, काठमाडौं । नेपाल राष्ट्र बैंकले दसैँंमा साढे नौ अर्ब ५० करोड रुपैयाँ बराबरको नयाँ नोट सटही गरेको छ। नयाँ र सुकिला गरेर केन्द्रीय बैंकले नोट सटही गरेको हो।

राष्ट्र बैंक मुद्रा व्यवस्थापन विभागका प्रमुख तथा प्रवक्ता लक्ष्मीप्रपन्न निरौलाले पाँच, १०, २०, ५० र सय रुपैयाँ दरका नोट सटही गरेको र गत वर्षको भन्दा यो तीन अर्ब कम सटही भएको बताए।

उनले सीमा घटाएको र सुकिला नोटलाई प्राथमिकतामा राखेका कारण सटहीका लागि यसपाली कम पैसा बाहिर गएको बताए। यस दसैँमा नयाँ नोट छापिएर समयमा नपुग्दा राष्ट्र बैंकले सटही सीमा घटाएको उनको भनाई छ।

उनका अनुसार नोटलाई जतन गरौँ भन्दै नयाँ र सुकिला नोटहरु सटही गरिनुका साथै नयाँ नोट कोलकाता बन्दरगाहामै रोकिँदा राष्ट्र बैंकले सुकिला नोटलाई प्राथमिकता दिने नीति लिएको हो।

उनले गत वर्ष सरह यसवर्ष पनि ठूला दरका नोट बाहिर गएका छन्। पाँच सय र हजार दरका नोट ५२ अर्ब रुपैयाँ बराबरको बैंकिङ कार्यालयबाट बजारमा गएको जानकारी दिए।