विप्लव समूहका नेता गुणराज लोहनी गिरफ्तार

५ कार्तिक, काठमाडौं । नेत्रविक्रम चन्द ‘विप्लव’ समूहका नेता गुणराज लोहनीलाई प्रहरीले गिरफ्तार गरेको छ । उनलाई जिल्ला प्रहरी कार्यालय चितवनको टोलीले सोमबार बिहान चितवनको भरतपुर महानगरपालिका-११ बसेनी घरबाटै गिरफ्तार गरेकाे हो।

लोहनी विप्लव समूहको केन्द्रीय सदस्यको जिम्मेवारीमा थिए । तर, लोहनीको स्वास्थ्य समस्याका कारण केन्द्रीय समितिमा रहेर काम गर्न नसक्ने भन्दै उनलाई पार्टीबाट विदाई गरिएको थियो ।

लोहनीले चितवन प्रहरीलाई पनि पार्टीले आफूलाई दुई महिना अगाडि नै कारबाही गरिसकेको र हाल स्वतन्त्र नागरिकको रुपमा बसीरहेको प्रारम्भिक बयान दिएका छन् ।

उनीबारे थप अनुसन्धान भइरहेको जिल्ला प्रहरी कार्यालय चितवनका डीएसपी एवम् प्रवक्ता एकनारायण कोइरालाले जानकारी दिए ।