पार्टीभित्र दबाव बढेकै बेला ओली अजरबैजान प्रस्थान

७ कार्तिक, काठमाडौं । पार्टी राजनीतिमा तीब्र दवाव पर्न थालेपछि केही विश्राम गर्नका लागि प्रधानमन्त्री खड्गप्रसाद ओली आज अजरबैजान प्रस्थान गरेका छन् ।

पार्टीका अर्का अध्यक्ष पुष्पकमल दाहालले पूर्वसहमति बमोजिम कार्यकारी अध्यक्ष र आलोपालो प्रधानमन्त्रीको सहमति पालना नगरेको भन्दै राेइलो गर्न थालेपछि ओली अजरबैजान भ्रमण गर्ने निर्णयमा पुगेका हुन् ।

ओली निकट स्रोत भन्छ– असंलग्न राष्ट्रको शिखर सम्मेलनमा भाग लिन प्रधानमन्त्री जाने तयारी थिएन । विगतमा पनि यस्तो सम्मेलनमा उपराष्ट्रपतिलाई पठाइने प्रचलन थियो । छिमेकी भारतले विगत लामो समयदेखि सम्मेलनमा भाग लिन उपराष्ट्रपतिलाई नै पठाउने गरेको छ । यसपाला पनि उपराष्ट्रपति नै सहभागी भइरहेका छन् । नेपाल भने प्रधानमन्त्री ओली नेतृत्वको प्रतिनिधिमण्डलसहित अजरबैजानतर्फ लागेको छ । वास्तवमा ओली प्रचण्डको कचकचबाट उम्कन नै सम्मेलनमा जान राजी भएका हुन् ।

आज मध्यान्ह उनी नेपाली प्रतिनिधिमण्डलको नेतृत्व गर्दै त्यसतर्फ प्रस्थान गरिसकेका छन् । उनी कार्तिक १० गते स्वदेश फर्कने कार्यक्रम रहेको छ । शिखर सम्मेलनका क्रममा ओलीले भेनेजुएलाका कम्युनिष्ट राष्ट्रपति मुडुरोलाई भेट्दै छन् ।विगतमा प्रचण्डले मुडुरोको पक्षमा वक्तव्य निकाल्दा ओलीले घुमाउरो पारामा विरोध जनाएका थिए । तर अहिले भने उनै मुडुरोलाई भेट्न ओली राजी भएका हुन् । भेनेजुएलाको आन्तरिक राजनीतिप्रति शक्ति राष्ट्र अमेरिकाले विरोध जनाउँदै आएको छ ।

मुडुरो सरकारलाई अमेरिकाले अवैध घोषणा गरेको छ । अजरबैजान भ्रमणका क्रममा प्रधानमन्त्री ओलीले बंगलादेशकी प्रधानमन्त्री शेख हसिना र भारतका उपराष्ट्रपति एम भेइकाई नायडूसँग पनि बेग्ला बेग्लै भेट गर्ने कार्यक्रम रहेको परराष्ट्र मन्त्रालय स्रोतले जनाएको छ ।

असंलग्न राष्ट्रहरुको यो १८ औं शिखर सम्मेलन हो । यो संगठनमा हाल नेपाल लगायत विश्वका १२० राष्ट्र सदस्य छन् भने १७ मुलुक पर्यवेक्षकका रुपमा सहभागी हुँदै छन् । शितयुद्ध कालमा विश्व अमेरिका र सोभियत संघ पक्षमा आवद्ध रहेका बेला सन् १९६१ मा असंलग्न राष्ट्रहरुको बेग्लै समूह स्थापना भएको हो ।