साँझ साढे ६ बजे फेरि क्याबिनेट बस्दै

१७ कात्तिक, काठमाडौं । प्रधानमन्त्री केपी शर्मा ओलीको खस्कँदो स्वास्थ्य अवस्थाले गर्दा केही महत्वपूर्ण निर्णय भटाभट गर्न थालिएको छ । सायद भोलि अर्काे चरणका लागि डाइलोसिस गर्नुपर्ने भएकाले ओलीले लगातार मन्त्रिपरिषद वैठक बसाई रहेका छन् ।

आज साँझ ५ बजे आफ्नै सरकारी निवासमा दोस्रो चरणको बैठक डाकिएपनि फेरि डेढघण्टा ढिलो गरि शुरु हुने भएको छ । अहिले साढे ६ बजे प्रधानमन्त्री निवास वालुवाटारमा मन्त्रिपरिषदको आकस्मिक वैठक बस्न लागेको हो ।

आज विहान पनि मन्त्रिपरिषद बैठक बसेको थियो । सो बैठकले डा. भगवान कोइरालालाई नेपाल मेडिकल काउन्सिलको अध्यक्षमा नियुक्त गरेको छ भने त्रिभुवन विश्वविधालयको उपकुलपतिमा नेत्र विशषेज्ञ डा. धर्मकान्त बाँस्कोटालाई नियुक्त गरिएको छ ।

एकजना मन्त्रीले दिएको जानकारी अनुसार, आज बेलुकी साढे ६ बजे फेरि क्याबिनेट बैठक छ भनेर मुख्यसचिवले फोन गरेका छन् । तर बैठकको एजेण्डा भने खुलाइएको छैन । स्रोतका अनुसार साँझ बस्ने बैठक पनि नियुक्ति वा जिम्मेवारी दिने सम्वन्धी नै रहेको छ ।