कम्युनिष्ट कार्यकर्ता भर्ति हुँदैछन् प्रदेश प्रमुखमा, को को हुन् ती ?

१८ कात्तिक,काठमाडौं । प्रधानमन्त्रीसमेत रहेका नेपाल कम्युनिष्ट पार्टीका अध्यक्ष खड्गप्रसाद ओली दोस्रो पटक मृगौला प्रत्यारोपण गर्ने मनस्थितिमा पुगेसँगै राज्य संयन्त्रलाई पूरै एमालेकरण गर्न कस्सिएका छन् ।

हिजो मात्रै हठात रुपमा सातै प्रदेशका प्रमुखलाई बिना कारण र आधार पूर्वाग्रही ढंगले बर्खास्त गरेपछि रिक्त स्थानमा पूर्वएमालेकरण गर्ने अन्तिम तयारीमा लागेका हुन् ।

यस प्रयोजनका लागि अहिले ओलीको सरकारी निवास बालुवाटारमा पार्टी सचिवालय वैठक सकिएकाे छ । वैठकमा ओलीले सात वटै प्रदेशमा पार्टी कार्यकर्ता नै भर्ति गर्ने प्रस्ताव गरेको स्रोतले बताएको छ । जसमा प्रदेश नं. १ का लागि डा. के एम खम्बुको नाम ओलीले प्रस्ताव गरेका छन् । तर पूर्व माओवादी पक्षले भने शर्मिला त्रिपाठीलाई नियुक्त गर्न लबिङ गरिरहेको छ ।

यस्तै प्रदेश नं. २ का लागि पूर्वएमालेको तर्फबाट पूर्वमन्त्री धर्मनाथ प्रसाद साहको नाम प्रस्ताव भएको छ भने पूर्व माओवादीले भने दिनेशचन्द्र यादवको नाम अघि सारेको छ । उता, प्रदेश ३ का लागि पूर्व एमालेको तर्फबाट धेरै जनाको नाम चर्चामा ल्याइएको छ । जसमा अमृत बोहरा, रघुजी पन्त, महेन्द्र पाण्डे लगायत छन् भने पूर्व माओवादीले अमिक शेरचनको नाममा सहमति खोजेको छ ।

यस्तै गण्डकी प्रदेशका लागि सोमनाथ प्यासीलाई एमालेले प्रस्ताव गरेको छ । प्यासीको नाममा भने लगभग सहमति भएको बुझिएको छ । यस्तै कर्णाली प्रदेशका लागि पूर्व माओवादी नेता बिनोदकुमार शाहको नाम पनि स्वीकृत हुने अवस्था रहेको छ । उता, सुदूरपश्चिम प्रदेशका लागि पूर्वमाओवादीले खेमराज भट्ट मायालुको नाममा सहमति खोजेको छ ।

अहिले सचिबालय वैठकले निर्णय गरे लगत्तै बालुवाटारमा बस्ने मन्त्रिपरिषद बैठकले यी नाम अनुमोदन गरी नियुक्त गर्न राष्ट्रपति समक्ष बुझाइने तयारी रहेको पनि स्रोतको दावी छ ।

प्रदेश प्रमुख जस्तो पदलाई ओली सरकारले राजनीतिक कार्यकर्ता भर्ति केन्द्र बनाउन लागेकोमा प्रमुख प्रतिपक्षी दल नेपाली कांग्रेसले आपत्ती जनाएको छ ।

तथापी, नेकपाको आज मध्यान्ह बसेको सचिवालय बैठकले सातै प्रदेशका प्रदेश प्रमुखहरुको नाम सिफारिस गरिसकेकाे छ । जसअनुसार सोमनाथ अधिकारी (कास्की), तिलक परियार (बाँके),  शर्मिला त्रिपाठी (काठमाडौं), अमिक शेरचन (चितवन), विष्णु प्रसाईँ (झापा), गोविन्द कलौनी (डडेल्धुरा) र धर्मनाथ यादव (सिरहा) को नाम सरकारसमक्ष सिफारिस गर्ने निर्णय भएको बैठकपछि एक नेताले जानकारी दिए ।