कास्की क्षेत्र नं. २ मा कांग्रेसको विवाद

१९ कार्तिक, काठमाडौं । आगामी मंसिर १४ मा हुने संघ, प्रदेश र स्थानीय तहको उपनिर्वाचनको उमेदवारी दर्ता गर्ने दिन आइसक्दा पनि प्रमुख प्रतिपक्षी दल नेपाली कांग्रेस भित्र विवादले बास लिएको छ । कास्की क्षेत्र नं. २ मा धनराज गुरुङ र देवराज चालिसे कसलाई टिकट दिने भन्नेबारे कांग्रेस भित्र विवाद चर्केको हो । जसका कारण कांग्रेसले उमेदवार टुंगो लगाउन सकेको छैन ।

उमेदवार चयन गर्न आज विहान पार्टी सभापति शेरबहादुर देउवा निवास बुढानिलकण्ठमा बसेको बैठक विवादका कारण स्थगित भएको छ । विहान साढे ९ बजेदेखि सुरु भएको बैठक साढे ११ बजे स्थगित भएको छ ।

कास्की–२ मा कसलाई उमेदवार बनाउने विषयमा विवाद हुँदा टुंगोमा पुग्न नसकिएको स्रोतको भनाई छ । उक्त क्षेत्र वरिष्ठ नेता रामचन्द्र पौडेलले पाएकोले उमेदवार चयनमा समस्या भएको हो ।

पौडेलको चाहना छिमेकी जिल्ला स्याङ्जाका नेता धनराज गुरुङलाई उमेदवार बनाउने रहेको बुझिन्छ । तर स्थानीय नेता कार्यकर्ता भने त्यसको विरोधमा रहेका छन् । उनीहरुले पहिला पनि चुनावमा उठेका देवराज चालिसेलाई टिकट दिन माग गरेका छन् ।

दुईजनाको नाम आएका कारण उम्मेद्वारको टुंगो लगाउन ढिलाई भएको हो :– केन्द्रीय प्रवक्ता विश्वप्रकाश शर्मा भन्छन् । अहिले स्थगित भएको बैठक पुनः बस्ने र आजै सबै उमेदवारको नाम टुंगो लगाउने दावी शर्माले गरेका छन् ।