राष्ट्र बैंकको गभर्नर बन्न पूर्वएमालेमा तँछाड मछाड

२० कार्तिक, काठमाडौं । प्रधानमन्त्री खड्गप्रसाद ओलीको स्वास्थस्थिति खस्कँदै गर्दा उनले राज्यसंयन्त्रमा भने दरिलो उपस्थितिका लागि कब्जा गर्ने रणनीतिलाई तीब्रता दिएका छन् ।

यसैक्रममा अब नेपाल राष्ट्र बैंकको गभर्नर पदका लागि ओलीको रुची र झुकाव देखापरेको छ । आगामी चैतमा वर्तमान गभर्नर डा. चिरञ्जीवी नेपालको पदावधि समाप्त हुनु अगावै ओली आफू निकटलाई सो पदमा सुनिश्चित गर्न चाहन्छन् ।

यसका लागि उनले अर्थमन्त्री डा. युवराज खतिवडालाई ओलीले जिम्मेवारी दिइसकेका छन् । प्रधानमन्त्रीले नै गभर्नरमा आफू निकटलाई नियुक्त गर्न हतारो देखाएपछि सो पदका आकांक्षीको चलखेल पनि बढ्न थालेको छ ।

अर्थमन्त्री डा. खतिवडा नयाँ गभर्नरका लागि हालका अर्थसचिव राजन खनाललाई अगाडि बढाउन इच्छुक थिए । तर प्रधानमन्त्री ओलीले उक्त प्रस्ताव अस्वीकार गरेपछि पूर्वएमालेका लागि लेबी तिर्नेहरुको ताँती लागेको छ ।

यो अभियानमा सबैभन्दा अगाडि राष्ट्र बैंककै एकजना डेपुटी गभर्नर चिन्तामणि शिवाकोटी देखिएका छन् । उनी जसरी भएपनि गभर्नर बन्ने एक सूत्रीय अभियानमा छन् । आफ्नो उद्येश्य पूरा गर्न उनी आफ्ना प्रतिस्पर्धीलाई धूलो चटाउने रणनीतिमा जुटिसकेका छन् ।

त्यसको पहिलो शिकार उनले आफू भन्दा सिनियर डेपुटी गभर्नर शिवराज श्रेष्ठलाई बनाइसकेका छन् । श्रेष्ठ विरुद्ध उनले ठूलै षडयन्त्र गरेको देखिन्छ । श्रेष्ठलाई प्रतिस्पर्धाबाट बाहिर पार्न उनले शक्तिको दुरुपयोग गरेका छन् । विभिन्न आरोप लगाएर उनले श्रेष्ठलाई फसाउने षडयन्त्र जारी राखेका छन् ।

पूर्वएमाले निकट लेबी तिर्ने शिवाकोटीले प्रतिस्पर्धी श्रेष्ठविरुद्ध छानबीन कमिटी नै बनाउने वातावरण बनाई छाडेका छन् । सत्ता र शक्ति दुरुपयोग गरी उनले श्रेष्ठविरुद्ध विभिन्न आरोप लगाइ छानविन गराउने अवस्था निर्माण गरिदिएका छन् । त्यही आरोपका कारण डेपुटी गभर्नर श्रेष्ठ हाल निलम्बनमा परेका छन् ।

यसका लागि उनले पार्टी मात्र नभई अन्य सम्वन्धको समेत दुरुपयोग गरेका छन् । आफ्ना सहपाठी रुपनारायण भट्टराईको समेत उनले सहारा लिएका छन् । सम्पति शुद्धिकरण विभागका महानिर्देशक भट्टराईमार्फत उनले श्रेष्ठ विरुद्ध छानविनको हौवा पिटाएका छन् । श्रेष्ठको निलम्बनसँगै शिवाकोटीको एउटा तगारो खुलेको छ ।

तर आफैंमा कमजोर क्षमता र केटाकेटी स्वभावका शिवाकोटी अझै पनि बलियो उमेदवार बन्न भने सकेका छैनन् । अर्थमन्त्री स्वयं शिवाकोटीलाई गभर्नर बनाउन भित्रैदेखि तयार छैनन् । तर पूर्वी पहाडको कुमाई र प्रधानमन्त्री ओलीसँगको पारिवारिक नाता जोडिएका शिवाकोटी भने जसरी भएपनि सो पद हत्याउने ध्याउन्नमा लागेका छन् ।

स्रोतका अनुसार, ओली पनि शिवाकोटीलाई बनाउने पक्षमा नकारात्मक छैनन् । तर उपयुक्त पात्र खोज्न भने उनले अर्थमन्त्रीलाई अह्राएका छन्:– स्रोतले भनेको छ । राष्ट्र बैंकका आम कर्मचारी भने शिवाकोटीले गभर्नर पद पाएभने राष्ट्र बैंक र गभर्नर दुबैको गरिमा र सम्मान ध्वस्त हुने बताउँछन् । शिवाकोटीले जस्तोसुकै लबिङ गरेपनि ढुक्क हुने अवस्था भने नभएको स्रोतको दावी छ ।

शिवकोटी भन्दा काबिल र क्षमतावान् अन्य व्यक्ति पनि प्रतिस्पर्धामा भएकाले त्यसै भन्ने स्थिति छैन । नेपाल लगानी बोर्डका कार्यकारी प्रमुख महाप्रसाद अधिकारीले पनि गभर्नर बन्न दौडधूप गरेकाले शिवाकोटी कमजोर हुन सक्ने लख काटिएको छ । अधिकारीको पक्षमा प्रधानमन्त्री समक्ष गतिलै लबिङ भएको बुझिएको छ ।

अर्थमन्त्री डा. खतिवडा पनि राजन खनाललाई बनाउन नसक्दा महाप्रसाद उपयुक्त पात्र भएको ठान्ने मध्येका हुन् । यस्तै राष्ट्रिय योजना आयोगका पूर्व उपाध्यक्ष डा. मीनबहादुर श्रेष्ठ, नेपाल बैक लिमिटेडका वर्तमान अध्यक्ष बासुदेव अधिकारी र राष्ट्र बैंककै पूर्व कार्यकारी निर्देशक भाष्करमणि ज्ञवाली पनि प्रतिस्पर्धामा भएकाले शिवाकोटीको त्रास यथावत छ ।

उल्लेखित सबै नाम शिवाकोटी भन्दा अब्बल मानिन्छन् । अर्थमन्त्री डा. खतिवडा आफैं पनि राष्ट्र बैंकका क्याडर रहेकाले हरेक व्यक्तिको योग्यता र क्षमताबारे राम्रो ज्ञान राख्छन् । खतिवडा स्वयं पनि आगमी फागुनसम्म मात्र अर्थमन्त्री रहने भएकाले उनको रुचि पनि गभर्नर बनाउनेमा रहेको छ । तर प्रधानमन्त्री ओलीले जस्को नाम लिन्छन् अन्तत: उसैलाई सिफारिश गर्नुपर्ने बाध्यता उनका सामुन्ने रहेको छ ।

र याे पनि … डेपुटी गर्भनर श्रेष्ठबिरुद्ध सुनियोजित षडयन्त्र रच्ने को को हुन् ?