झोलुंगे पुल बनाउन स्वीस सरकारको २ अर्ब १० करोड अनुदान दिने

२१ कार्तिक, काठमाडौं । स्वीस सरकारले झोलुंगे पुल तथा प्रदेश र स्थानीय सरकार सुशासन प्रवद्र्धन कार्यक्रम कार्यान्वयन गर्न २ अर्ब १० करोड रुपैयाँ अनुदान सहयोग उपलव्ध गराउने भएको छ ।

अनुदान सहयोग सम्बन्धी समझदारीपत्रमा नेपालका लागि स्वीजरल्यान्डका राजदूत एलिजावेथ फ पेलर ओस्वाल्ड र अर्थ सचिव राजन खनालले बुधबार अर्थ मन्त्रालयमा आयोजित एक कार्यक्रममा हस्ताक्षर गरे ।

कार्यक्रममा दिइएको जानकारी अनुसार नेपालका दुर्गभ भेगका ८ हजारभन्दा बढी स्थानामा निर्मित झोलुंगे पुलबाट औसतमा दैनिक १४ लाख मानिसको आवागमन हुने गरेको छ । यस्तै, विद्यालयमा उपस्थित हुने बालबालिकाको संख्यामा पनि १६५ वृद्धि भएको छ । पुल बनेपछि विद्यालय जान सहज भएको हो ।

त्यसैगरी, उपचारका लागि स्वास्थ्य केन्द्रमा पुग्नेको संख्या पनि २६५ ले बढेको छ । ती पुलका कारण १ करोड ८० लाख सर्वसाधारणलाई सुरक्षित रुपमा नदीनाला वारपार गर्न सजिलो भएको छ ।

आफ्ना नागरिकलाई आधारभूत सेवासम्मको पहुँच सुनिश्चित गर्न नेपाललाई अझै पनि २ हजार ४ सय झोलुंगे पुल आवश्यक पर्ने सरकारको भनाई छ ।