आजदेखि नेपाल–युरोपेली सङ्घ संयुक्त आयोगको बैठक सुरु

२२ कार्तिक, काठमाडौं । नेपाल–युरोपेली सङ्घ संयुक्त आयोगको बैठक शुक्रबार आजदेखि काठमाडौँमा सुरु हुने भएको छ ।

बैठकमा नेपाली प्रतिनिधिमण्डलको नेतृत्व परराष्ट्र सचिव शङ्करदास वैरागी र एशिया–प्रशान्त क्षेत्रका लागि सङ्घका नायब प्रबन्ध निर्देशक पाओला पम्पालोनीले सङ्घको प्रतिनिधिमण्डलको नेतृत्व गर्ने भएका छन् ।

बैठकमा दुवै पक्षले आपसी हितका क्षेत्रीय र बहुपक्षीय विषयका साथै नेपाल र युरोपेली सङ्घबीचको सम्बन्धका सबै पक्षबारे विचारविमर्श गर्ने परराष्ट्र मन्त्रालयले जनाएको छ ।

बैठकमा भाग लिने क्रममा राजधानीमा रहेको उक्त प्रतिनिधिमण्डलले सङ्घीय मामिला तथा सामान्य प्रशासनमन्त्री लालबाबु पण्डित, अर्थमन्त्री डा युवराज खतिवडा, प्रधानमन्त्रीका परराष्ट्र मामिला सल्लाहकार डा राजन भट्टराई, संस्कृति, पर्यटन तथा नागरिक उड्डयन मन्त्रालयका सचिव केदारबहादुर अधिकारीलाई बेग्लाबेग्लै भेटेर पारस्परिक हित र चासोका विषयमा छलफल गरेको थियो । उक्त प्रतिनिधिमण्डलले परराष्ट्रमन्त्री प्रदीपकुमार ज्ञवालीसँग भोलि शुक्रबार नै शिष्टाचार भेट गर्ने कार्यक्रम छ ।

बिहीबार अपराह्न नेपाल र युरोपेली सङ्घबीच विकास सहायतासम्बन्धी आयोग उपसमितिको तेस्रो बैठक परराष्ट्र मन्त्रालयमा भएको थियो । त्यसअवसरमा द्विपक्षीय विकास सहायताका समग्र पक्षमा विचार आदानप्रदान भएको थियो ।