अनसनरत डा. केसीलाई काठमाडौं ल्याउन सेनाको हेलिकप्टर डडेल्धुरामा

२५ कार्तिक काठमाडौं । अनसनरत डा.गोविन्द केसीलाई थप उपचारका लागि काठमाडौं ल्याउन नेपाली सेनाको हेलिकप्टर सोमबार बिहान डडेल्धुरा पुगेको छ ।

डडेल्धुराका प्रमुख जिल्ला अधिकारी राजु प्रसाद पौडेलका अनुसार नेपाली सेनाको हेलिकप्टर डडेल्धुरा पुगिसकेको तर डा. केसीले उपचारका लागि अन्यत्र जान नमानेको बताइएको छ ।

डा. केसी अनसन बसेको क्षेत्रमा अहिले ठूलो संख्यामा प्रहरी परिचालन गरिएको छ । डडेल्धुरा अस्पतालले डा. केसीको स्वास्थ्य अवस्था नाजुक बनेको र थप उपचारका लागि अन्यत्र लैजानुपर्ने भन्दै आइतबार साँझ नै विज्ञप्ति जारी गरेको थियो ।

तर डा. केसीले उपचारका लागि नजाने अडान लिएका छन् । प्रहरीले जबरजस्ती गर्न खोजेको भन्दै डा. गोविन्द केसीका समथर्कहरु सडकमा उत्रेका छन् । स्थिति असामान्य बन्न नदिन प्रयास गरिरहेको प्रमुख जिल्ला अधिकारी पौडेलले बताए ।