नेकपाको पार्टी एकीकरणले पायो पूर्णता, अनुशासन आयोगमा अमृतकुमार बोहरा

२५ कार्तिक, काठमाडौं । के पी ओली प्रधानमन्त्री भएको २० महिनापछि औपचारिक रुपमा मन्त्रिमण्डल पुनर्गठनबारे छलफल सुरु भएको छ । मन्त्रिमण्डल पुनर्गठन गर्न चौतर्फी दवाव परेकाले ओली अन्ततः यो मुद्धामा औपचारिक रुपमा छलफल गर्न राजी भएका छन् ।

यसै प्रयोजनका लागि अहिले ओलीले बालुवाटारस्थित सरकारी निवासमा नेपाल कम्युनिष्ट पार्टीको सचिबालय बैठक डाकेका छन् । दुई तिहाईको जनसमर्थन प्राप्त भएपनि ओली सरकार राष्ट्र र जनताका लागि घाँडो साबित भएको सन्दर्भमा नयाँ टिम बनाएर काम गर्ने खोक्रो नारा अघि सारिएको छ ।

लगभग दुई वर्षको कार्यकाल फगत् गँजेडी गफ र निरंकुशता लाद्ने अभिप्रायले अघि बढेपछि ओली सरकारको व्यापक विरोध र आलोचना चुलिएको छ । अब जनताको ध्यान अयन्त्रै मोड्न फेरि सचिबालय सदस्य र मन्त्रिमण्डल नै फेरेर काम गर्ने अभियानमा ओली मण्डली जुटेको छ ।

यसका लागि अर्का अध्यक्ष पुष्पकमल दाहाल प्रचण्ड अझ बढी सक्रृय देखिएका छन् । प्रधानमन्त्रीको सचिबालयमा कार्यरत सल्लाहकार समूह र मन्त्रिमण्डलमा फेरबदल गर्ने गृहकार्यमा जुटेका प्रधानमन्त्री ओली र पार्टी अध्यक्ष प्रचण्ड कुनै निश्कर्षमा पुगिसकेका छैनन् । प्रारम्भिक छलफल भएपनि त्यसलाई अनुमोदन गराउन सचिबालय वैठक डाकिएको स्रोतले बताएको छ ।

यो अजेण्डामा प्रधानमन्त्री ओली र पार्टी अध्यक्ष प्रचण्डबीच पटक पटक छलफल भएपनि अन्य नेताहरुसँग भने केही कुरा भएको छैन । वरिष्ठ नेता झलनाथ खनाल र नेता माधवकुमार नेपालसँग यो अजेण्डामा प्रधानमन्त्री र प्रचण्डले कुनै छलफल नगरेको बताइन्छ । त्यसैले यसबारे औपचारिक कुरा होस् भनेर नै आजको सचिबालय बैठक डाकिएको ओली निकट एक नेताले बताएका छन् ।

स्रोतका अनुसार हिजो आइतबार ओली र प्रचण्डले यो विषयमा लामै छलफल गरेका छन् । साथमा गृहमन्त्री रामबहादुर थापा बादल र महासचिब विष्णु पौडेल सहभागी सो छलफलले पूर्व एमाले र पूर्व माओवादीका तर्फबाट मन्त्रिमण्डलमा सहभागी मन्त्रीको पर्फरमेन्सबारे गम्भिरतापूर्वक कुरा गरेको थियो ।

छलफलमा प्रधानमन्त्रीले गृहमन्त्री बादलको कार्यशैलीप्रति पनि असन्तुष्टी जनाएको स्रोतले बताएको छ । त्यसैले सबै मन्त्रीलाई सामुहिक रुपमा राजीनामा गराउने वा पर्फरमेन्सका आधारमा मूल्याङकन गर्ने भन्ने बारे यकिन भैनसकेको बताइएको छ ।

आजको सचिबालय बैठकमा यसबारे औपचारिक छलफल गराउने र एक दुई दिनमा प्रचण्डसँग अन्तिम निर्णय गरेर अनुमोदन गराउने ओलीको तयारी रहेको स्रोत भन्छ । यसरी हेर्दा ओलीले मन्त्रिमण्डल पुनर्गठन गर्दा पनि माधव नेपाल पक्षसँग कुनै छलफल गर्ने सोच बनाएको देखिएन ।  स्रोत भन्छ – माधव कम्रेड निकट एकआध मन्त्री रहलान् , तर कोटामा तोकेर दिने पक्षमा ओली छैनन् ।

त्यसैले पुनर्गठन गर्दा आसन्न उप निर्वाचन प्रभावित हुन सक्ने भएकाले पछि गर्ने की भन्ने विषयमा पनि प्रधानमन्त्री ओली र प्रचण्ड गम्भिर देखिएका छन् । तर आज बस्ने सचिबालय बैठकले यो अजेण्डालाई औपचारिक रुपमा प्रवेश चाहिं गराइने तयारी ओलीको रहेको छ – स्रोत भन्छ । आज बस्ने सचिबालय बैठकले पार्टी एकीकरणमा बाँकी मुद्धालाई संवोधन गर्ने सहमति पनि बताइएको छ । मन्त्रिमण्डल पुनर्गठनबारे अजेण्डा प्रवेश मात्र भएपनि संगठन एकीकरणको काम चाहिं अघि बढ्ने छ ।

यसैबीच सचिबालयको वैठकले पार्टीको केन्द्रीय स्तरको एकीकरणसँग सम्बन्धित विषय भने टुंग्याएको छ । बालुवाटारमा सोमबार भएको बैठकले यो निर्णय गरे सँगै पार्टी एकीकरणले पूर्णता पाएको छ । भर्खरै टुंगिए अनुसार, केन्द्रीय अनुशासन आयोगको अध्यक्षमा नेता अमृत बोहरा र सचिबमा केशव रोकायलाई ल्याइएको छ ।

यस्तै निर्वाचन आयोगको अध्यक्षमा विष्णुपुकार श्रेष्ठ र सचिवमा माधव पौडेललाई जिम्मेवारी दिइएको छ । लेखा परीक्षण आयोगको अध्यक्षमा डा. पुष्प कँडेल र सचिवमा टेकनाथ आचार्यलाई तोकिएको छ ।

यसैगरी सल्लाहकार कमिटीको अध्यक्षमा केशव बडाल र सचिबमा नन्दकुमार थापालाई नियुक्त गरिएको छ । साथै, जेष्ठ कम्युनिष्ट मञ्चको अध्यक्षको जिम्मेवारी नन्दकुमार प्रसाईंलाई दिइएको छ भने सचिवमा गोविन्द ज्ञवालीलाई ल्याइएको छ ।
प्रवास कमिटीका सन्दर्भमा भने सहमति जुटिनसकेको बताइन्छ । बैठक जारी छ , संभवत यसबारे पनि टुंगो लाग्ला – एकजना सचिबालय सदस्यले भनेका छन् ।