प्रधानमन्त्री ज्यू, हिम्मत छ भने कालापानीमा नेपाली सेनालाई तैनाथ गर्नुस !

२८ कार्तिक काठमाडौं । नेपाली कांग्रेस निकट नेपाल तरूण दलका महासचिव भुपेन्द्रजंग शाहीले सीमा अतिक्रमण भएका सम्पूर्ण स्थानमा नेपाली सेना तैनाथ गर्न सरकारलाई चेतावनी दिएका छन्।

आगामी मंसिर १४ गते हुने उपनिर्वाचनमा कांग्रेसलाई जिताउनको लागि सञ्चालन गरिएको ‘तरूण निर्वाचन यात्रा २०७६’ का क्रममा दाङ पुगेका महासचिव शाहीले प्रधानमन्त्री केपी शर्मा ओलीलाई अतिक्रमित सीमा नाकामा नेपाली सेनालाई तैनाथ गर्न ध्यानाकर्षणा गरेका छन् ।

महासचिव शाहीले भने,‘राष्ट्रवादी प्रधानमन्त्री ओलीसँग हिम्मत छ भने कालापानीमा नेपाली सेनालाई तैनाथ गनुहोस् । तरूण दलले साथ दिन्छ । होईन भने राष्ट्रवादको नारा मात्र लगाएर देशको सीमा सुरक्षा हुँदैन ।

प्रधानमन्त्रीले आजका दिनसम्म कुनैपनि भाषणमा भारतको विस्तारवादी चरित्रका बारेमा बोल्नु भएको छैन । खोक्रो राष्ट्रवादको कुनै अर्थ हुँदैन।’ साथै महासचिव शाहीले भने, ‘राष्ट्रवादी सरकारको पालामा देशको सीमा मिचिएको छ । देशमा भ्रष्टाचार व्याप्त छ । नातावाद कृपावादको चंगुलमा देशलाई फसाई सकिएको छ।’

दाङका प्रदेश उम्मेदवार र घोराही उपमहानगरपालिका वडा नम्बर १६ नेपाली कांग्रेस उम्मेदवार ताराबहादुर डागीलाई अग्रिम शुभकामना दिँदै स्थानीयलाई जनमत प्रदान गर्न आग्रह गरेका छन्।

कार्यक्रममा तरुण दल दाङका अध्यक्ष टीका जिएम, तरुण दल रोल्पा अध्यक्ष तिलक बुढाथोकी, तरूण दल मुगुका अध्यक्ष रमेश मल्ल, तरूण दलका केन्द्रीय पार्षद गौरव लामा लगायतले कांग्रेसलाई जिताउन आग्रह गरेका छन् ।