व्यापार विस्तारमा आक्रामक माछापुच्छ्रे बैंक, तीन महिनामा ९ अर्बको निक्षेप र ८ अर्बको कर्जा लगानी

२ मंसिर,काठमाडौं । तीन अर्बको ऋणपत्र उत्साहजनक रुपमा बिक्री गर्न सफल माछापुच्छ्रे बैंकले चालु आर्थिक बर्षको प्रथम तीन महिनामा करिब १७ अर्बको आक्रामक व्यापार विस्तार गरेको छ ।

९ अर्बको निक्षेप संकलन र ८ अर्ब भन्दा बढीको कर्जा लगानी गरेर आक्रमक व्यापार विस्तारमा अघि बढेको बैंकले १२ वटा नयाँ शाखा खोलेर १४३ वटा पुर्याएको छ । बैंकले गत आर्थिक बर्ष मात्रै ४३ वटा शाखा थपेर १३१ वटा पुर्याएको थियो ।

बैंकमा असोजमसान्तसम्म ९१ अर्ब २७ करोड निक्षेप संकलन रहेको छ भने कर्जा लगानी ८६ अर्ब ६३ करोड पुगेको छ । गत आबको पहिलो त्रैमाससम्ममा बैंकमा ८५ अर्ब १९ करोड निक्षेप रहेको थियो भने कर्जा लगानी ७५ अर्ब ९ करोड पुगेको थियो ।

यस अवधिमा बैंकले ३७ करोड ६० लाख रुपैयाँ मुनाफा आर्जन गरेको छ। मुनाफाबाट शेयरधनीलाई बाड्न मिल्ने मुनाफा भने १५ करोड ५ लाख रहेको छ ।

बैंकको खराब कर्जा अनुपात (एनपीएल) अत्यन्त न्यून ०.३१ प्रतिशत रहेको छ भने कर्जा-पुँजी-निक्षेप अनुपात ७७.०८ प्रतिशत रहेको छ । बेसरेट १०.५६ प्रतिशत रहेको छ ।

गतवर्ष जस्तै चालु आर्थिक वर्षको पहिलो तीन महिनाको अवधिमा बैङ्कले आफ्नो समग्र गतिविधिलाई द्रुतगतिमा विस्तार गर्दै लगेको उसको आर्थिक विवरणमा उल्लेख गरिएको छ ।