उपनिर्वाचन २०७६ : घरदैलोमा व्यस्त उम्मेदवार

२ मंसिर डोटी । आदर्श गाउँपालिका–२ मा वडाध्यक्ष पदको उपनिर्वाचनका लागि यतिबेला चुनावी सारगर्मी बढेको छ । आफ्ना उम्मेदवारका लागि राजनीतिक दलका नेता भोट माग्न गाउँ पसेका छन् ।

मंसिर १४ गते हुने वडाध्यक्षको निर्वाचनका लागि गत कात्तिक २७ गते मनोनयत दर्ता गराएका सबै उम्मेदवार यतिबेला मतदाता रिझाउन घरदैलो अभियानमा जुटेका छन् । उनीहरु खानेपानी, शिक्षा, स्वास्थ्य र सडकका लागि विषेश पहल गर्ने भन्दै स्थानीयवासीलाई रिझाउन थालेको बाझककानीका मकर खड्काले बताए । उनले भने, “पार्टीभन्दा पनि वडाको विकास गर्नेलाई भोट हाल्छौँ ।”

वडाध्यक्षमा भूमिसिहं खड्काले स्वतन्त्र उम्मेदवारी दिनुभएको छ । नेपाली कांग्रेसबाट महादेव साउद, नेपाल कम्युनिष्ट पार्टी नेकपाबाट रामबहादुर बोहरा र राष्ट्रिय प्रजातन्त्र पार्टीबाट काशिराम ओझाले उम्मेदवारी दर्ता गराएका छन् । निर्वाचनमा नेकपा र काङ्ग्रेस उम्मेदवारबीच मुख्य प्रतिस्पर्धा हुने देखिन्छ ।

आ–आफ्ना उम्मेदवारका पक्षमा मतदान गर्न नेकपा र काङ्ग्रेसका केन्द्रीय, प्रदेश, जिल्ला र स्थानीय तहका नेता भोट माग्न ब्यस्त छन् । “किसानका खेतबारीमै पुगेर भोट माग्न थालेका छन्”, स्थानीयवासी टेकबहादुर खड्काले भने। उक्त वडामा दुई हजार ५०० मतादाता छन् ।