ओली अलोकतान्त्रिक : पौडेल

८ मंसिर काठमाडौं । नेपाली जनताले दुई तिहाईको समर्थन दिएको प्रधानमन्त्री केपी शर्मा ओली सरकार संसद् छलेर अध्यादेशमार्फत निरंकुश शासन गर्न उद्यत् देखिएका छन् ।

संवैधानिक परिषदलाई मर्यादित र सन्तुलित बनाउन संविधानले गरेका व्यवस्था बमोजिम जारी ऐन अध्यादेशमार्फत संशोधन गरी आफूखुसी गर्न ओली सरकार अग्रसर भएको छ ।

खासगरी संवैधानिक अंग तथा परिषदमा नियुक्ति गर्न प्रतिपक्षी दल अवरोधक बनेको ठहर गरी ओलीले संवैधानिक परिषद सम्वन्धी ऐन नै शंशोधन गर्न लागेका छन् ।

यसले ओलीको लोकतान्त्रिक चरित्र र दुई तिहाईको औकात प्रष्ट भएको संविधान विद्वहरुको भनाई छ । लोकतन्त्रलाई समृद्ध बनाउने भन्दा कमजोर बनाउने उद्येश्यले यस्तो काम गर्न लागिएको भन्दै प्रमुख प्रतिपक्षी दल नेपाली काँग्रेस लगायत संविधानका मर्मज्ञहरुले विरोध जनाएका छन् ।

यसै प्रसंगमा आज राजधानीमा आयोजित एक कार्यक्रममा कांग्रेस वरिष्ठ नेता रामचन्द्र पौडेलले ओली सरकारको निरंकुशताको खुलेर आलोचना गरे । डेमोक्रेटिक लयर्स एसोसिएसन डीएलएको वार्षिक साधारणसभालाई संवोधन गर्दै पौडेलले भने– लोकतन्त्र र संविधान विपरीत ल्याउन खोजिएको अध्यादेश रोक्ने काम राष्ट्रपतिबाट होस् ।

संवैधानिक पदमा बस्ने व्यक्तिको नियुक्ति सर्वसम्मत हुनुपर्छ भन्ने संविधानको अक्षर र भावना विपरीत ओली सरकार कार्यकर्ता भर्ति गरेर विपक्षीलाई दुख कष्ट दिने पक्षमा रहेको स्पष्ट हुन्छ – पौडेलले भने – हामी लोकतन्त्रका लागि सधैं संघर्ष गर्ने पार्टीका नेता कार्यकर्ता यसको विरोधमा रहने छौं ।

प्रधानमन्त्रीले गत्ती गर्न खोजे सच्याउने दायित्व राष्ट्रपतिको हुने भन्दै उनले उक्त अध्यादेशमा लालमोहर नलगाउन आग्रह गरे ।