जनतालाई सही व्यक्ति छान्ने अवसर छ : नेता रिजाल

९ मंसिर पोखरा । नेपाली कांग्रेसका केन्द्रीय सदस्य डा. मीनेन्द्र रिजालले निष्ठावान् व्यक्तिलाई रोज्नका लागि मतदातासँग आग्रह गरेका छन् ।

पोखरा महानगरपालिका–२१ स्थित ठूलीस्वाँरामा आइतबार आयोजित चुनावी कोणसभालाई सम्बोधन गर्दै नेता रिजालले खेमराज पौडेल निष्ठावान् र परिपक्व व्यक्ति रहेको उल्लेख गरे । उनले अहिलेको मत पौडेलका लागि मात्र नभएर सरकारलाई खबरदारीका लागि पनि आवश्यक रहेको बताए ।

कोणसभामा उम्मेदवार पौडेल, चुनावी कमाण्डर गुरु बराल, नेताहरू धनराज गुरुङ, देवराज चालिसे, सोभियतबहादुर अधिकारी, सांसद वृन्दा देवीलगायतले आ–आफ्नो धारणा राखेका थिए । सो अवसरमा ठूलीस्वाँरा टोल विकास संस्थाका अध्यक्ष नरबहादुर राना, स्थानीय समाजसेवी नरबहादुर राना र भीमबहादुर रानाले कांग्रेस नेताहरुलाई स्थानीय समस्या बारे जानकारी गराएका थिए ।

कांग्रेसको घरदैलो अभियान जारी छ । सोअन्तर्गत आज पोखरा–२० को भलाममा उम्मेदवारसहितको घरदैलो अभियान चलिरहेका छ । पोखराका अन्य वडामा पनि नेता कार्यकर्ताले घरदैलो गरी मतदाता भेटघाट कार्यक्रमलाई जारी राखेको कास्की कांग्रेसका सभापति कृष्ण केसीले जानकारी गराए ।

पोखरा–७ मा घरदैलो अभियान जारी रहेको र मतदाता भेटघाट अन्तिम चरणमा पुगेको चुनाव प्रचार समितिका संयोजक शुक्रराज शर्माले बताए । यस्तै पोखरा–११ मा पनि चुनाव प्रचार अभियान जारी छ । चुनाव प्रचार समितिका संयोजक शारदा पौडेलका अनुसार पार्टीका सबै संयन्त्रको बैठक बसेर विभिन्न समिति बनाएर अघि बढाइएको छ ।