प्रधानमन्त्री ज्यू, राष्ट्रवाद प्रतिक्रियामा कि परिणाममा ?

११ मंसिर काठमाडौं । नेपाली कांग्रेसले कालापानीको विषयलाई विषयान्तर नगरी परिणाम हासिल हुने पहलकदमी गर्न सरकारलाई सुझाव दिएको छ ।

उपनिर्वाचन नजिकिँदै जाँदा शनिबारबाट सरकारका असफलताबारे प्रश्न उठाउँदै आएको कांग्रेसले मंगलबार सरकारलाई कालापानीको विषयलाई विषयान्तर नगरी परिणाम हासिल गर्ने पहल कदमी गर्न सुझाव दिएको हो ।

कांग्रेस प्रवक्ता विश्वप्रकाश शर्माले भिडियो सन्देश जारी गर्दै भनेका छन्, “कालापानी : विषयान्तर होइन परिणाम हासिल गर्ने पहलकदमी गर ।” कांग्रेसले गत शनिबारदेखि बुधबारसम्म हरेक दिन बेलुकी ५ बजे सरकारका विभिन्न असफलता मध्येबाट एउटा असफलताका बारेमा प्रश्न गर्दै आएको छ ।

नेपाल कम्यनिस्ट पार्टी (नेकपा) नेतृत्वमा सरकार गठन भएको २१ महिना पुगेको अवसर पारेर कांग्रेसले केही दिनअघि सरकारका २१ असफलताहरु सार्वजनिक गरेको थियो । तिनै असफलतामा टेकेर मतदातालाई आकर्षित गर्न कांग्रेसले हरेक दिन सरकारलाई लिखित वक्तव्य र भिडियो सन्देशमार्फत प्रश्न गर्दै आएको छ ।