उपनिर्वाचन : शान्तिपूर्ण रुपमा मतदान सम्पन्न

१४ मंसिर काठमाडौं । प्रतिनिधिसभा, प्रदेशसभा र स्थानीय तहका रिक्त ५२ पदका लागि शनिबार शान्तिपूर्ण रुपमा मतदान भएको छ । मतदानका लागि बिहान ७ देखि साँझ ५ बजेसम्मको समय तोकिएको थियो ।

निर्वाचन आयोगका अनुसार मतदान उत्साहजनक र शान्तिपूर्ण भएको छ । केही मतदान केन्द्र नजिक सामान्य विस्फोट भएपनि त्यसको असर समग्र मतदानमा नपरेको भन्दै आयोगले करिब साठी प्रतिशत मतदान भएको र मतपेटिका संकलनपछि स्थानीय स्तरमा हुने सर्वदलीय बैठकको निर्णयअनुसार मतगणना सुरु गरिने जनाएको छ । आयोगका अनुसार भक्तपुर, बाग्लुङ र दाङमा मतदान सम्पन्न भएको हो ।

कास्की २ सहित सबै स्थानमा उपनिर्वाचन शान्तिपूर्ण रुपमा सम्पन्न भएको छ । प्रतिनिधिसभा सदस्यका लागि कास्की २ र प्रदेश सभा सदस्यका लागि भक्तपुर १ ‘क’, दाङ ३ ‘ख’ र बाग्लुङ २ ‘ख’ मा मतदान भएको छ । यस्तै धरान उपमहानगरपालिकासहित केही स्थानीय तहका प्रमुख र वडाध्यक्षका लागि पनि मतदान भएको छ ।

कास्की २ मा मतदान स्थललाई लक्षित गरेर बम विस्फोट समेत भएको छ । तर मानवीय क्षति भने भएको छैन । मतदान सकिएसँगै मतपेटिकाहरु संकलन गर्ने काम सुरु भएको छ । निर्वाचन आयोगका अधिकारीहरुका अनुसार ७० प्रतिशत मत खसेको अनुमान छ । यद्यपि यकिन विवरण आउन बाँकी छ ।