काठमाडौं महानगरका पहिलो मेयर श्रेष्ठको निधन

२७ मंसिर काठमाडौं । काठमाडौं महानगरका पहिलो जननिर्वाचित मेयर जनकमान श्रेष्ठको शुक्रबार निधन भएको छ ।श्रेष्ठको ९२ वर्षको उमेरमा टेकुस्थित आफ्नै निवासमा निधन भएको हो ।

श्रेष्ठ २०१० सालमा तत्कालीन काठमाडौं नगरपालिकाको सभापतिमा निर्वाचित भएका थिए । उनलाई निर्वाचनमा तत्कालीन नेपाल कम्युनिष्ट पार्टीले समर्थन गरेको थियो । तर, उनी कम्युनिष्ट पार्टीमा संगठित थिएनन् ।

श्रेष्ठ कलेजोको क्यान्सरबाट पीडित थिए । श्रेष्ठको शुक्रबारै पशुपति आर्यघाटमा अन्त्येष्टि गरिएको छ । स्वर्गीय श्रेष्ठका श्रीमती, एक छोरा र एक छोरी छन् । यसैबीच काठमाडौं महानगरपालिकाका प्रमुख विद्यासुन्दर शाक्यले शोक वक्तव्य जारी गर्दै श्रेष्ठको निधनमा दुःख व्यक्त गरेका छन् ।