अस्ट्रेलियामा इतिहासकै सबैभन्दा गर्मी

२ पुस एजेन्सी । नेपालमा मौसम बदलीका कारण चिसोको कहर बढेको छ । अझै भनौं तराईका धेरै भू भागमा त बिहान साँझको शितलहरका कारण जनजिवन कष्टकर भइरहेको बेला अस्ट्रेलियामा भने अहिले इतिहासकै सबैभन्दा गर्मी भइरहेको छ ।

अस्ट्रेलियाको औषत तापत्रम ४०.९ डिग्री सेल्सियससम्म पुगेको र यो अस्ट्रेलियाको इतिहासमा सबैभन्दा गर्मी रहेको त्यहाँको मौसमविभागले जनाएको छ ।

मंगलबार अधिक गर्मी भएको र तापक्रमले नयाँ उचाई कायम गरेको मौसमविभागले उल्लेख गरेको छ । यसअघि सन् २०१३ को जनवरी ७ मा अस्ट्रेलियाको तापक्रम ४०.३ डिग्री पुगेको थियो । मंगलबार औषत तापक्रम त्यो भन्दा बढी ४०.९ डिग्री पुगेको बीबीसीमा उल्लेख छ ।

अस्ट्रेलियामा पछिल्लो समय गम्भीर खडेरी छ । यस्तै केही समयअघि मात्रै भीषण डढेलो पनि लागेको थियो । अझै पनि विभिन्न क्षेत्रमा डढेलो लागिरहेको छ ।

तापक्रम अझै बढ्दै जाने मौसमविदले अनुमान गरेका छन् । अस्ट्रेलियाभर हाल तातो हावा चलिरहेको छ, जसका कारण जनजीवन प्रभावित भएको छ ।