कांग्रेस मुख्यालयमा नेबिसंघको रिले अनशन !

२ पुस काठमाडौं । नेपाल विद्यार्थी संघको कुन्दनराज काफ्ले समूहले सानेपास्थित नेपाली कांग्रेसको मुख्यालयमा बुधबारदेखि रिले अनशन थालेको छ ।

३२ वर्षे उमेरहदसहितका माग पूरा हुनुपर्ने अडानसहित नेविसंघको काफ्ले समूहले रिले अनशन थालेको हो । बुधबार पहिलो दिनको रिले अनशनमा ६ जना विद्यार्थीहरु बसेका छन्। निवर्तमान केन्द्रीय सदस्य रुपा पोख्रेलको नेतृत्वमा रिले अनशन सुरु भएको हो ।

सानेपामा पद्मा भुसाल, मनिता सिटौला, बिन्दा बोगटी, रोस्मिता कार्की र रुपा पोख्रेलसहितलाई पूर्वमहामन्त्री कुन्दनराज काफ्लेले माला लागाइदिँदै रिले अनसनको सुरुवात गरेका थिए ।

रिले अनशनमा बसेका विद्यार्थीहरुले यदि नेपाली कांग्रेसले आफूहरुका माग पूरा नगरेमा आमरण अनसन बस्‍ने चेतावनी दिएका छन् ।

कार्यअवधि सकिएपछि अहिले नेविसंघ निष्कृय छ । कांग्रेस सभापति शेरबहादुर देउवाले करिब ५० वर्षीय राजीव ढुंगानालाई नेविसंघको नेतृत्व दिन लागेपछि विद्यार्थीहरु पटक पटक आन्दोलित छन् ।