हुलाकी राजमार्ग निर्माणमा सरोकारवालाको चासो

मिना कडेल

१४ पुस पुर्बी नवलपरासी । पुर्बी नवलपरासीको गैंडाकोट,अरुणखोला दुम्कीबास देखि त्रिबेणी जोडने हुलाकी राजमार्ग निर्माण बर्षौ देखि अलपत्र अवस्थामा परे पछि सरोकारवालाहरुले अहिले चासो ब्यक्त गरेका छन । उनीहरुले दश बर्ष अघि नै भौतिक तथा पुर्वाधार मन्त्रालयले निर्माण हुने निर्णय गरे पनि सो हुलाकी मार्ग कुनै हालतमा पनि निर्माण भएर जनतालाई सेबा दिनुपर्नेमा जोड दिएका छन् ।

 कावासोतीमा उपभोक्ता हित संरक्षण मञ्चले आयोजना गरेको राष्ट्रिय निकुञ्जको संरक्षण र भौतिक पर्वाधार विकास सम्बन्धि अदालतको फैसला विषयमा गरिएको कार्यक्रममा अधिकाशंले हुलाकी सडक निर्माणमा सरकारले चासो दिनु पर्ने बताए ।

हलाकी राजमार्ग संघर्ष समितिका संयोजक श्रीधर शर्माले हुलाकी राजमार्ग निर्माण गर्दा मध्यवर्ति र चितवन राष्ट्रिय निकुञ्जलाई असर पर्छ भन्दैमा मुख्य राजमार्गको विकल्पको रुपमा रहेको ठोरी त्रिवेणी हुलाकी राजमार्गको काम सेलाउन नहुने मा जोड दिए ।

दश बर्ष अघि सर्वे गरिएको हुलाकी मार्गले गति लिन नसक्नु दुखद् भएको बिनयी त्रिबेणी गाउँपालिकाका अध्यक्ष डम्बर बहादुर जीसीले बताए । अध्यक्ष जीसीले हुलाकी मार्ग निर्माणले चितवन राष्ट्रिय निकुञ्ज र मध्यवर्ति क्षेत्रलाई कुनै असर नगर्ने हुदा हुलाकी बाटो निर्माण प्राथमिकतामा पर्नु पर्ने बताए । उनले हुलाकी मार्ग लाइफ लाइनको रुपमा रहेको हुदा बाटो निर्माणले प्राथमिकता पाउनु पर्ने मा जोड दिए ।

अहिले निकुञ्ज भएर निस्कने ६७ किलो मिटरको ठोरी त्रिवेणी हुलाकी मार्ग निर्माणमा सर्वोच्चले रोक लगाए पनि बाटो निर्माणको काम विवादमा परेको छ ।  चितवन राष्ट्रिय निकुञ्जका प्रमुख संरक्षण अधिकृत नारायण रुपाखेतीले निकुञ्जको निति र नियम भन्दा बाहिर नगई वाटो विस्तार गर्न सकिने बताए ।

उनले निकुञ्जमा रहेका वन्यजन्तुहरुलाई कुनै असर नहुने गरि काम गर्नुपर्ने मा जोड दिए । ‘विकास वातावरण मैत्री हुनु पर्छ, भुगोल र दुरी अनुसार विकास भए मात्र विकास अर्थ रहन्छ ’, अधिकृत रुपाखेतीले भने । उनले निकुञ्जले बाटो निर्माण गर्न नहुने भन्दा पनि अदालतले गरेको फैसलालाई नै प्राथमिकता दिनु पर्ने बताए ।

‘योजना प्लान्ट र पैसामा नविक्ने हुदा उचित किसिमको योजना तयार बनाउन सकियो भने सार्थक हुन्छ’ रुपाखेतीले भने । नवलपुरमा मात्र गैडाकोट देखि दुम्कीबास सम्म ६० किलो मिटर र निकुञ्जले छोएको त्रिवेणी दुम्कीबासको करिव १८ किलोमिटर हुलाकी आयोजना दश वर्ष अघि देखि अलपत्र पर्दे आएको छ । कार्यक्रममा प्रदेश सासंद जनक लाल श्रेष्ठले निकुञ्जलाई पनि असर नपर्ने र निर्माणको काम पनि तयार हुने गरि काम गर्नुपर्ने बताए ।

उनले चितवन राष्ट्रिय निकुञ्ज देशको गहना भएको हुदा यसको संरचना तथा वातावरणमा ध्यान दिन र नवलपुरको लाइफ लाइनको रुपमा रहेको हुलाकी राजमार्ग पनि निर्माण गर्नुपर्नेमा जोड दिए ।