पौडेल समुहद्धारा पुष २१ गते जिल्ला सभापतिहरुको भेला बोलाउने निर्णय

१५ पुस काठमाडौं । नेपाली कांग्रेसको असन्तुष्ट पक्षले केन्द्रीय समितिले गरेको निर्णयका विरुद्ध जिल्ला सभापतिको भेला बोलाउने निर्णय गरेको छ ।

पार्टी कार्यालय सानेपामा मंगलबार बसेको वरिष्ठ नेता रामचन्द्र पौडेल समूहको बैठकले केन्द्रिय समितिले गरेको निर्णय र आगामी रणनीति तय गर्न जिल्ला सभापतिको भेला पुष २१ गते बोलाउने निर्णय गरेको हो ।

बैठकले केन्द्रिय समिति गरेको यसअघिको निर्णय नसच्चाएसम्म कुनै पनि बैठकमा सहभागी नहुने निर्णय पनि गरेको वरिष्ठ नेता पौडेलले बताए । उनले केन्द्रिय समितिले एकलौटी रुपमा गरेको निर्णयले महाधिवेशनलाई नै अनिश्चित बनाएको आरोप पनि लगाए ।

उनले पार्टीभित्र भएको एकलौटी निर्णयले पार्टीलाई थप धरासयी बनाएको हुँदा देशभरका कांग्रेस कार्यकर्ता सचेत हुने बेला आएको र यसका लागि आफुहरुले छलफलको आयोजना गरेको जानकारी पनि दिए ।

त्यस्तै कांग्रेस महामन्त्री शशांक कोइरालाले मेलमिलापको नीति अनुसार नै काग्रेस अघि बढ्नुपर्ने बताए । यसअघि शुक्रबार कांग्रेस केन्द्रिय समिति बैठकले महाधिवेशन ०७७ फागुनमा गर्ने, विभाग बढाएर ४७ वटा बनाउने, तरूण दलको कार्यकाल ६ महिना थप गर्नेसहित विभिन्न ९ वटा निर्णय गरेको थियो । वरिष्ठ नेता पौडेल समूहले भने सो बैठक बहिष्कार गरेको थियो ।