प्रदेश ३ को राजधानी : धुलिखेल राख्ने प्रस्ताव दुई तिहाइ बहुमतले अस्वीकृत, आजबाट नाम बाग्मती र केन्द्र हेटौंडा कायम

२७ पुष, हेटौँडा । कांग्रेस र नेकपाको ह्वीप पछि आजबाट प्रदेश नम्बर ३ को नाम बाग्मती र केन्द्र हेटौंडा बनेको छ । दुई तिहाइ बहुमतले पारित प्रदेश नं ३ को राजधानी हेटौँडा र नाम वाग्मती राख्न सत्तारुढ दल नेपाल कम्युनिष्ट पार्टी ‘नेकपा’ र प्रमुख प्रतिपक्षी दल नेपाली कांग्रेसबीच एकमत देखिएका थिए ।

ती दलको आज विहान यहाँ बसेको संसदीय दलको अलग अलग बैठकले राजधानी हेटौँडा र नाम वाग्मतीका पक्षमा मतदान गर्न आफ्ना सदस्यलाई ह्वीप समेत जारी गरेको थियो । प्रदेशसभा बैठकले दुई तिहाइ मतका साथ हेटौंडा राजधानी राख्ने प्रस्ताव पारित गरेको सभामुख सानुकुमार श्रेष्ठले घोषणा गरेका हुन्। हेटौंडा राजधानी राख्ने पक्षमा एक सय ५ मत आएको छ भने विपक्षमा तीन मत छ । प्रदेशसभामा एक सय १० सांसद भए पनि बैठकमा एक सय आठ सांसद मात्रै उपस्थित भएका थिए।

प्रदेशसभामा विवेकशील नेपाली दल र विवेकशील साझाले राजधानीमा काभ्रेको धुलिखेल प्रस्ताव दर्ता गरेपछि नेकपा र कांग्रेसले ह्वीप जारी गरेका हुन् । सो बैठकमा साझा विवेकशील पार्टीका नेता रमेश पौडेलले काभ्रेको धुलिखेललाई राजधानी बनाइयोस् भनी प्रस्तुत गरेको प्रस्तावलाई बैठकले अस्वीकृत गर्यो । नेकपा प्रदेश नं ३ का संसदीय दलका नेता तथा मुख्यमन्त्री डोरमणि पौडेलले दलको निर्णयविपरीत नगर्न बैठकमा निर्देशन दिएको बैठकमा सहभागी एक प्रदेशसभा सदस्यले जानकारी दिए ।