गायक भट्टराईको असामयिक निधनले थापा स्तब्ध !

२९ पुस काठमाडौं । काठमाडौंको तीनकुनेमा कार दुर्घटना हुँदा गजल गायक निशान भट्टराईको मृत्यु भएको छ । बा १० च ३०४ नम्बरको कार सोमबार राति बिजुलीको खम्बामा ठोक्किएर घाइते भएका भट्टराईको उपचारको क्रममा मङ्गलबार बिहान राष्ट्रिय ट्रमा सेण्टरमा मृत्यु भएको प्रहरीले जनाएको छ ।

दरबारमार्गमा रहेको बानथाई रेस्टुरेण्टबाट फर्कने क्रममा आफैले चलाएको कार सडकको खम्बामा ठोक्किएर दुर्घटना भएको थियो । सुनसरी धरान उपमहानगरपालिका १४ का भट्टराई रेस्टुरेन्टमा गजल गायनमा सक्रिय थिए । उनी गायिका लोचन भट्टराईका भाइ रहेको प्रहरीले जनाएको छ ।

यसैबिच, नेपाली कांग्रेसका युवा नेता गगन थापाले गायक निशान भट्टराईको असामयिक निधनको खबरले स्तब्ध बनाएको बताएका छन् । मंगलबार सामाजिक सञ्जाल फेसबुकमा एक शोक स्टाटस लेख्दै थापाले लोकप्रिय गायक निशानप्रति हार्दिक श्रद्धान्जली अर्पण गरेका छन् ।