कांग्रेसद्वारा देशका ७७ वटै जिल्ला प्रशासनमा विरोधपत्र

५ माघ, काठमाडौं । केपी ओली सरकारको ज्यादति र जनविरोधी कानून निर्माण प्रक्रियाको विरोध गर्दै प्रमुख प्रतिपक्षी दल नेपाली कांग्रेसले आज देशैभरिका जिल्ला प्रशासन कार्यालयमा बिरोधपत्र बुझाएको छ ।

सरकारले संसदीय समितिमा पेश गरेको मिडिया काउन्सिल, सूचना प्रविधि, नागरिकता सम्बन्धी, विशेष सेवा गठन र सञ्चालन लगायतका विधेयकको विरोध गर्दै तत्काल नसच्याए अझै सशक्त विरोध गर्ने चेतावनी पनि कांग्रेसले दिएको छ ।

देशका ७७ वटै जिल्ला प्रशासन कार्यालयमा पुगी नेपाली कांग्रेसले विरोध जनाएको पार्टी केन्द्रीय कार्यालयले जारी गरेको विज्ञप्तिमा उल्लेख छ ।

आज अपरान्ह साढे १२ बजे काठमाडौंको माइतीघर मण्डेलामा भेला भएका कांग्रेस कार्यकर्ताहरुको जुलुस बबरमहलस्थित जिल्ला प्रशासन कार्यालय पुगी विरोधपत्र बुझाएको हो ।