बजारको माहोल राम्रो बन्दा “ईण्ट्राडे हाईमा” बजार बन्द हुनुलाई कसरी हेर्ने ?

१३ माघ, काठमाडाैं । आज दिउँसाे १२ : ३० बाट बजारमा खरिदकर्ता आकर्षित हुँदा दोश्रो बजारले राम्रो आकृति बनाएर बन्द भएको छ । साताको दोश्रो कारोवार दिन नेप्से परिसूचक २३ दशमलव ९५ अंकले बढेको छ । १ दशमलव ८८ प्रतिशतले वृद्धि भएको शेयरबजार १३०० दशमलव ६२ को विन्दुमा बन्द भएको छ । आज १८० कम्पनीहरुको ९१ करोड ७३ लाख बराबरको शेयर खरिदबिक्री भएको छ ।

आज सम्पूर्ण उपसुचकमा वृद्धि देखिएको छ । आज ट्रेडिङ्ग उपसुचकमा सर्वाधिक ४ दशमलव ४७ प्रतिशतको वृद्धि देखिएको छ ।

आज बजार १२७६ दशमलव ६८ को विन्दुमा खुलेको थियो भने आजको बजारको न्यून विन्दु १२७४ दशमलव ०३ थियो । बजारले ११ बजेर ३५ मिनेटमा न्यून विन्दु समातेको थियो । आज बजारले ३ बजे अर्थात बजार बन्द हुँदा उच्च विन्दु समातेको थियो । बजारको उच्च विन्दु र अन्तिम विन्दु एकै हुनुलाई प्राविधिक भाषामा ईण्ट्राडेहाई भनिन्छ । यस प्रकारको प्रवृत्तिलाई सकारात्मक मानिन्छ ।  

नेपाल लाईफ इन्स्योरेन्सको शेयर सर्वाधिक कारोवार हुँदा समिट लघुवित्तका शेयरधनीले सर्वाधिक कमाए भने जोशी हाईड्रोपावरका शेयरधनीले सर्वाधिक गुमाए ।

आज सर्वाधिक कारोवार हुने, कमाउने र गुमाउने कम्पनीहरु:

प्राविधिक बिश्लेषण :

मुख्य प्रतिरोध : १३१० पहिलो टेवा : १२७५

• आज बजारमा क्रेताको चाप रहेको देखिन्छ । आज नेप्से परिसूचक १३०० दशमलब ६२ को बिन्दुमा बन्द भएको छ ।
• दुई दिनको कारोबारले “बुलिस एन्गल्फिङ्ग” मैनबत्तीको चित्र बनाएको छ । यसले बजार बढ्न सक्ने जनाउँदछ ।
• दैनिकी अवधिमा “आरएसआई” ६४ दशमलब ६४ को बिन्दुमा छ । आरएसआईको प्रवृत्तिले बजार सकारात्मक भई हालेको जानकारी गराएको देखिदैन् ।
• “एडिएक्स” तथा जोड र बिजोड “डाइरेक्सनल इन्डेक्स”हरुले विक्रेताको चाप हालसम्म रहेको जानकारी गराएको छ।
• “अन ब्यालेन्स भल्यूम” ले क्रेताको चाप हुन थालेको जनाएको छ ।
• नेप्से बढेमा पहिलो प्रतिरोध १३१० को क्षेत्रमा पाउने देखिन्छ र घटेमा पहिलो टेवा १२७५ को क्षेत्रमा पाउने देखिन्छ।