कांग्रेस सांसदका अगाडि सभामुख मौन

२४ माघ, काठमाडौं । ललिता निवास जग्गा प्रकरणमा नेपाल कम्युनिष्ट पार्टी (नेकपा)ले अख्तियार दूरुपयोग अनुसन्धान आयोगलाई मोहोरा बनाएर प्रमुख प्रतिपक्षी दल नेपाली कांग्रेसका अधिकांश व्यक्तिमाथि मुद्दा दायर गरेपछि उत्पन्न परिस्थितिका कारण संसद बैठक दुई दिनका लागि स्थगित भएको छ । नेकपाको प्रतिशोधपूर्ण राजनीतिका विरुद्ध कांग्रेस एक्लो बृहस्पतीको रुपमा उभिने भएपछि परिस्थिती प्रधानमन्त्रीसमेत रहेका नेकपा अध्यक्ष खड्गप्रसाद ओलीले सोचे विपरित हुन पुगेको छ ।

कांग्रेस सांसदहरूले सभामुख अग्निप्रसाद सापकोटाको पटक-पटकको आग्रह र अनुरोधलाई नमानेपछि कांग्रेसका सांसद मीन विश्वकर्मालाई बोल्नका लागि समय उपलब्ध गराएका थिए । सांसद विश्वकर्माले आयोगले आफ्नो अधिकारको दूरुपयोग गर्दै कसैलाई काखा र कसैलाई पाखा गरेर सरकारको लाचार छायाँ बनेको बताए ।

नेपाली कांग्रेसका सांसदले नेकपाले चालेको कदम कदापी सही र सत्य नभएको भन्दै विरोध गरेर संसद अवरोध गरेका कारण आज ३० मिनेटका लागि भनेर स्थिगित गरिएको थियो । तर, पछि बैठक सुरू नै हुन सकेन र प्रतिनिधिसभाको बैठक आगामी आइतबारसम्मका लागि स्थगित भएको छ ।

आज दिउँसो १ बजे संसद बैठक बोलाइएता पनि २० मिनेट ढिला मात्र सुरु भएको थियो । प्रतिनिधिसभा बैठकको शुरु हुन नपाउँदै कांग्रेस सांसदहरुले टेबल ठट्टउँदै उठेर विरोध जनाएका थिए । विराेध गर्दै सांसदहरू यथास्थानमा बस्न नमानेपछि सभामुख सापकाेटा माैन बसेका थिए । केही बेरकाे माैनता र सन्नाटा चिर्नका लागि उनी बाेल्थे तर कांग्रेस सांसदकाे अगाडि उनकाे कुनै जाेडबल चलेन ।

कांग्रेस सांसदले कुनै पनि हालतमा बैठक चल्न नदिने भन्दै अवरोध जारी गरेपछि सभामुख अग्नि सापकोटाले आधा घण्टाका लागि स्थगित गरेका थिए । सभामुख सापकोटाले दिउँसो २ः१० बजे पुनः बस्ने गरी बैठक स्थगित गरे । त्यस पछि एक सुचना जारी गर्दै संघीय संसद सचिवालयले अब अर्को बैठक आइतबार दिउँसो १ बजे बस्ने गरी स्थगित भएको जनाएको छ ।