ढुक्क हुनुस, एमसीसी कार्यान्वयन हुन्छ !

१ फागुन काठमाडौं । प्रधानमन्त्रीसमेत रहेका सत्तारुढ नेपाल कम्युनिष्ट पार्टीका अध्यक्ष खड्गप्रसाद ओलीले अमेरिकी सहयोग मिलेनियम च्यालेञ्ज कम्याक्ट ( एमसीसी ) लाई तमासा बनाउन खोजिएको भन्दै असन्तुटी व्यक्त गरेका छन् ।

सरकारी निवासमा आज नौ वाम दलका तर्फबाट बुझाइको ज्ञापन पत्र लिंदै उनले भने – अढाई वर्ष अघि भएको सम्झौताबारे अहिले अध्ययन कार्यदल बनाएर तमासा गरिएको स्वीकारे । नेकपाको हालै सम्पन्न केन्द्रीय कमिटी बैठकले एमसीसीबारे छानबीन गर्न वरिष्ठ नेता झलनाथ खनालको नेतृत्वमा तीन सदस्यीय कार्यदल बनाएको छ ।

यस्तो गैरजिम्मेवार शैलीले हाम्रो अन्तराष्ट्रिय विश्वसनीयता नै कमजोर बनाउने पनि उनले बताए । एमसीसी सैन्य प्रयोजनका लागि पनि नभएकाले अनुमोदन गर्नु पर्ने कुरामा उनले जोड दिए । आगामी पाँच वर्षमा सम्पन्न हुने एमसीसीले मुलुकको पूर्वाधार विकासमा बल पुग्ने भएकाले अनुमोदनमा ढिलाई गर्न नहुने पनि उनले बताए । प्रजातन्त्र , मानव अधिकार तथा स्वतन्त्रतासँग समेत जोडिएको एमसीसीलाई अस्वीकार गर्दा नेपालको लोकतान्त्रिक छविमा समेत असर गर्ने भएकाले अमेरिकी सहयोग स्वीकार गर्नु पर्ने उनको तर्क थियो ।

लोकतान्त्रिक शासन व्यवस्था भएका मुलुकले मात्र प्राप्त गर्ने यो सहयोगले हाम्रो अन्तराष्ट्रिय छवि पनि राम्रो बनाउँछ – उनले भने –हामी सत्तामा नभएका बेला गरिएको सम्झौताबारे अध्ययन गरेको हौं , कुनै कैफियत छैन । कुनै पूर्व सर्त नराखी दिइएको सहयोग उपयोग गरी सडक र विद्युतीय ट्रान्समिसन लाइन निर्माण गर्नु पर्ने उनको भनाई थियो ।