बाँस्कोटाले राजीनामा नदिए नेविसंघले आन्दोलनको आधीबेरी सिर्जना गर्ने

८ फागुन, काठमाडौं । सूचना तथा सञ्चारमन्त्री गोकुल बाँस्कोटा सेक्यूरिटी प्रेस खरिदका क्रममा प्राप्त हुने कमिसनसम्बन्धी विवादमा मुछिएका छन् । लेखा समितिमा छानबिनका क्रममा रहेको विषयसँग सम्बन्धित अडियो बिहीबार सार्वजनिक भएको हो ।

बिहीबार बिहान कमिसनसम्बन्धी विवादमा मुछिएका सञ्चारमन्त्री बाँस्कोटाको अडियो सार्वजनिक भएपछि यो समाचार यतिबेला चारैतिर भाइरल भएको छ । यसैबीच,नेपाली कांग्रेसको भ्रातृ संगठन नेपाल विद्यार्थी संघले सेक्युरिटी प्रेस खरिद मामिलामा कमिसनको हिसाबकिताब गर्ने सञ्चारमन्त्री गोकुल बाँस्कोटालाई तत्काल कारबाही गर्न सरकारसँग माग गरेको छ । नेविसंघका अध्यक्ष राजीव ढुंगानाले बिहीबार एक प्रेस विज्ञप्ति जारी गर्दै यस्तो माग गरेका हुन् ।

ढुंगानाद्वारा जारी विज्ञप्तिमा भनिएको छ, ‘भ्रष्टाचारीको मुख हेर्दिनँ भन्ने प्रधानमन्त्री के हेरेर बसिरहनु भएको छ ? प्रधानमन्त्रीले सञ्चारमन्त्रीलाई तत्काल कारबाही गरेर आफ्नो वचन पूरा गर्नु हुन्छ कि यस अघिका प्रकरण झै भ्रष्टाचारीका संरक्षकको रुपमा आफूलाई प्रस्तुत गर्नु हुन्छ ? भनेर नेपाली जनता ध्यानपूर्वक हेरिरहेका छन् ।’

७० करोड कमिसन सञ्चारमन्त्रीले मागेको अडियो ‘हाम्रा कुरा’मार्फत सार्वजनिक भइसकेको अवस्थामा निजलाई तत्काल बर्खास्त गर्न र निस्पक्ष अनुसन्धानको प्रक्रियालाई सघाउन नेपाली कांग्रेस सम्माननिय प्रधानमन्त्री ओलीलाई सार्वजनिक रुपले आग्रह गर्दछ,’ विज्ञप्तिमा भनिएको छ ।