उद्योगी व्यवसायीलाई चुनाव लाग्यो, ढकाललाई चुनाव जित्न फलामको चिउरा चपाउनु सरह

१२ फाल्गुण, काठमाडौं । देशका उद्योगी व्यवसायीहरुको सशक्त संगठन नेपाल उद्योग वाणिज्य महासंघको बहुप्रतिक्षित साधारणसभा आगामी चैत २८ र २९ गते काठमाडौंमा हुने भएको छ । महासंघ अध्यक्ष भवानी राणाको अध्यक्षतामा बसेको कार्यकारिणी बैठकले साधारणसभा कमलादीस्थित नेपाल प्रज्ञा प्रतिष्ठानमा गर्ने निर्णय गरेको हो । राणाको नेतृत्वमा बसेको यो अन्तिम कार्यकारिणी बैठक हो ।

महासंघको विधानमा केन्द्रको निर्वाचन हुनुभन्दा दुई महिना अघि नै प्रदेशको निर्वाचन गर्नुपर्ने प्रावधान भएपनि अब केन्द्रको निर्वाचन पछि मात्र प्रदेशको निर्वाचन हुने भएको छ । महासंघको अन्तिम कार्यकारिणी बैठकले विधान संशोधनको जिम्मा भने नवनिर्वाचित कार्यसमितिलाई दिने निर्णय गरेको छ ।

महासंघको विधान अनुसार वर्तमान वरिष्ठ उपाध्यक्ष शेखर गोल्छा नै स्वत अध्यक्ष हुनेछन् । तर साधारणसभाको रोचक पक्ष भने वरिष्ठ उपाध्यक्षमा हुने भाले भीडन्तलाई लिइएको छ । हालको विधान अनुसार वरिष्ठ उपाध्यक्ष नै अर्को कार्यकालका लागि स्वत अध्यक्ष हुने भएकोले यो पदमा दुईजना हेभिवेटको प्यानलसहितको चुनावी सरगर्मी रोचक बन्दै गएको हो । वरिष्ठ उपाध्यक्षका लागि जिल्ला नगरका उपाध्यक्ष किशोर प्रधान र एशोसियट उपाध्यक्ष चन्द्र ढकालले यसअघि नै उम्मेद्वारी दिने घोषणा गरिसकेका छन् । उद्योगी व्यवसायीलाई अहिले चुनावी माहोलले तताएको छ ।

यो साधारणसभामा वरिष्ठ उपाध्यक्षसहित पदाधिकारी, कार्यसमिति सदस्यहरुको निर्वाचन हुनेछ । वरिष्ठ उपाध्यक्षसहितको पदाधिकारी र सदस्यमा दुई गुटमा विभाजित भएर उद्योगी व्यवसायीहरु चुनावमा होमिने भएका छन् । एउटा गुटको नेतृत्व किशोर प्रधानले गर्दैछन् भने अर्को गुटबाट चन्द्र ढकाल अघि सरेका छन । प्रधान गुटबाट जिल्लानगर उपाध्यक्षमा दिनेश श्रेष्ठ र वस्तुगत उपाध्यक्षमा अञ्जन श्रेष्ठको चर्चा चलेको छ भने ढकाल गुटबाट जिल्ला नगर उपाध्यक्षमा गुणनिधी तिवारी र वस्तुगत उपाध्यक्षमा उमेशलाल श्रेष्ठको चर्चा हुने गरेको छ ।

तर दुवै गुटबाट एशोसिएट उपाध्यक्षमा कसलाई उठाउने भन्ने निर्णय भईसकेको छैन् । उद्योगी व्यवसायीहरु दुई गुटमा बाँडिएर चुनाव लड्न कस्सिएपछि महासंघको राजनीति थप पेचिलो बन्दै गएको छ । प्रधान गुटलाई शेखर गोल्छा लगायत मारवाडी समुहको सर्मथन प्राप्त भएकोले ढकाललाई चुनाव जित्न फलामको चिउरा चपाउनु सरह हुने उद्योगी व्यवसायी बीच चर्चा हुने गरेको छ ।

दुवै गुटले जिल्ला नगर, एशोसिएट र वस्तुगत सदस्यहरु आफ्नो पक्षमा पार्न दौडधुप तेज पारिरहेका छन् । सधैं निर्णायक हुने गरेको जिल्ला नगरका सदस्यहरुलाई आआफ्नो पक्षमा पार्न वरिष्ठ उपाध्यक्ष लगायतको टोली अहिले जिल्ला जिल्लामा आयोजित मेला महोत्सव लगायतका कार्यक्रममा पुग्ने गरेका छन् । एशोसिएटलाई आफ्नो पक्षमा पार्न दुवै गुटबाट प्रोक्सी मत संकलन गर्ने होडबाजी पनि चलिरहेको छ ।

महासंघमा तीन प्रकारका सदस्य छन् । एउटा जिल्ला तथा नगर उद्योग बाणिज्य संघ, दोस्रो वस्तुगत संघ र तेस्रो एशोसिएट सदस्य । महासंघको ७७ जिल्लाको ११२ जिल्ला तथा नगर उद्योग बाणिज्य संघ छन् र यी सदस्यहरुको मतको कुलभार ५० प्रतिशत हुनेगर्छ । त्यस्तै वस्तुगत र द्धिराष्ट्रिय उद्योग बाणिज्य संघमा १ सय २ सदस्य छन्, उनीहरुको मतभार २० प्रतिशत र एशोसिएटमा ९ सय ३२ सदस्य छन्, उनीहरुको मतभार ३० प्रतिशत हुने गर्छ । बिगतदेखि नै जिल्ला नगरमा जसको पल्लाभारी हुने गर्छ, त्यसैलाई चुनाव पनि जित्न सजिलो हुने गरेको छ ।