सुनको नयाँ रेकर्ड : तोलाको ८० हजार ५ सय रुपैयाँ

२१ फागुन काठमाडौं । कोरोना भाइरसको प्रभावका कारण लगानीकर्ता सुन बजारमा आकर्षित हुँदा सुनको भाउले नया रेर्कड बनाएको छ । नेपाल सुन चाँदी व्यवसायी महासंघका अनुसार यहि फागुन १२ गते तोलाको ८० हजार ३०० रुपैयाँ पुगेर नयाँ रेकर्ड बनाएको सुनको मूल्यले बुधबार फेरि त्यो रेकर्ड तोड्न सफल भएको छ ।

बुधबार छापावाला सुनको मूल्य प्रतितोला २२ सय रुपैयाँले बढेर ८० हजार ५०० रुपैयाँ पुगेको छ । यो अहिलेसम्मकै उच्च भाउ हो ।  मंगलबार सुनको मूल्य तोलाको ७८ हजार ३०० रुपैयाँ थियो । यस्तै, तेजावी सुनको मूल्य पनि बुधबार प्रतितोला २२ सय रुपैयाँले नै बढेर ८० हजार २०० रुपैयाँ पुगेको छ ।

यता चाँदीको भाउ पनि २० रुपैयाँले बढेर ८ सय ८० रुपैयाँमा कारोबार भइरहेको नेपाल सुन चाँदी व्यवसाही महासंघले बताएको छ । सुनको भाउ बढ्नुको प्रमुख कारण कोरोना भाइरसलाई देखाइएको छ ।