पौडेल पक्षले जिल्ला उपसभापतिहरूको प्रशिक्षण बहिस्कार गर्ने

२१ फागुन काठमाडौं । नेपाली कांग्रेसका वरिष्ठ नेता रामचन्द्र पौडेल पक्षका नेताहरु बुधबार छलफलमा जुटेका छन् । कांग्रेस नेता तथा पूर्वमहामन्त्री प्रकाशमान सिंहको निवास चाक्सीबारी ठमेलमा पौडेल पक्षका नेताहरुको आज छलफल भएको हो ।

भेलामा काठमाडौंमा उपलब्ध पौडेल पक्षीय जिल्ला सभापति तथा उपसभापति तथा केन्द्रीय सदस्यहरु सहभागी भएका थिए । पार्टीका केन्द्रिय सदस्य तथा विभाग प्रमुख छनौटप्रति पौडेल पक्षको असन्तुष्टि रहेको भन्दै नेपाली कांग्रेसका वरिष्ठ नेता पौडेल समूहले जिल्ला उपसभापतिहरूको प्रशिक्षण बहिस्कार गर्ने भएको छ ।

यस्तै छलफलमा सहभागी नेता अर्जुननरसिंह केसीले चारवर्षे कार्यदल सकिएको दुई दिनपछि सभापतिको सक्रियता सुरु भएको भन्दै पार्टी कब्जा गर्ने रणनीतिका साथ जे जस्ता कामकारबाही भइरहेको छ, त्यसमा हाम्रो असहमति छ भनी बताए ।