कोरोना संक्रमणको कारण विश्व कप छनोट सर्न सक्ने सम्भावना

२२ फागुन काठमाडौं । विश्वभर फैलिरहेको कोरोना भाइरस संक्रमणको कारण खेलकुद गतिविधि प्रभावित हुने भएको छ । यही मार्च महिनाको अन्तिममा नेपालमा हुने तय भएको विश्व कप छनोट अन्तर्गतको खेल उक्त भाइरसका कारण सर्न सक्ने सम्भावना बढेको हो ।

चीनको वुहान शहरबाट फैलिएको यो भाइरसका कारण नेपालमा पनि खेलकुद गतिविधि प्रभावित हुन सक्ने सम्भावना बढेर गएको छ । समूह बी अन्तर्गत नेपालले मार्च २६ मा चाइनिज ताईपेई र मार्च ३१ मा अष्ट्रेलियासँग दशरथ रंगशालामा हुँदैछ । अष्ट्रेलियाले खेल सार्न एएफसीमा निवेदन दिएको खबर सार्वजनिक भएपछि खेल हुने–नहुने अन्योल बढेको छ ।

यद्दपि अहिलेसम्म कुनै निर्णय नभएको र पत्रबारे कुनै जानकारी नभएको एन्फा प्रवक्ता किरण राईले बताए । अहिले नेपालमा बी डिभिजन लिग फुटबल भइरहेको छ भने मोफसलमा नकआउट टुर्नामेन्टहरु जारी छन । तर एन्फाले खेल रोक्ने वा गर्ने भन्नेबारे केही आधिकारिक निर्णय भएको छैन । एन्फाले आफैं पनि चैत ३ गतेदेखि महिला लिग आयोजना गर्दैछ ।

यता राष्ट्रिय खेलकुद परिषद ‘राखेप’का उपाध्यक्ष पिताम्बर तिम्सिनाले अहिले भइरहेका खेलकुद प्रतियोगिता र अब हुने खेलकुद प्रतियोगिता कोरोनाको संक्रमण कम नभएसम्म रोक्नको लागि विज्ञप्ती जारी गर्ने तयारीमा रहेको बताए । उनले राखेप सदस्य सचिव काठमाडौं बाहिर रहेकाले अहिले निर्णय सार्वजनिक हुन ढिलाइ भएको बताए ।