पाँच तारे होटलदेखि केबुलकार लगायत ठमेलका होटलहरु बन्द हुन थाले

६ चैत्र, काठमाडौं । सरकारले गत शुक्रबारबाट सिनेमा हल, सांस्कृतिक केन्द्रहरु, रंगशाला, खेलस्थल, जीम, हेल्थ क्लव, म्युजियम, स्विमिङ्ग पुल, मनोरञ्जनस्थल लगायतलाई ३० अप्रिल २०२० सम्म बन्द गर्ने निर्णय गरेसंगै काठमाडौंका पाँचतारे होटलहरू पनि बन्द हुन् थालेका छन् ।

कोरोना भाइरसको प्रकोप बढ्न थालेपछि सावधानी अपनाउन पाँच तारे हायात होटल आगामी ६ साताका लागि  बन्द गर्ने निर्णय ब्यवस्थापनले गरेको छ । नेपाल सरकारले पर्यटक भिसा पनि दिन बन्द गरेपछि खस्किदै गएको होटल ब्यवसाय धमाधम बन्द हुन थालेका हुन् । त्यस्तै अर्को पाँच तारे होटल सोल्टीले पनि दुईवटा विङ्मध्ये एउटा बन्द गरिसकेको छ। अर्को होटल र्याडिसन पनि भोलि सञ्चालक समितिको बैठक बसेर बन्द गर्ने पक्षमा छ। अन्य पाँचतारे होटलले पनि ब्यवसाय बन्द गर्ने तयारी गरिरहेका छन् ।

सरकारले अत्यावश्यक कामका बाहेक आवतजावत र हिँडडुल नगर्न आग्रह गरेको र सांस्कृतिक, सामाजिक र त्यस्तै कार्यहरुमा पार्टी प्यालेस, मठमन्दिर, गुम्बा, मस्जिद, चर्च जस्ता धार्मिक र सार्वजनिक स्थलहरुमा २५ जना भन्दा बढी मानिसहरु भेला हुन बन्द गर्ने निर्णय गरेपछि चन्द्रागिरि केवालकार पनि बन्द गर्ने तयारी भइरहेको छ भने मनकामना केबुलकारले पनि सेवा बन्द गरेको छ।

सार्वजनिक सवारी साधनहरुमा सीट क्षमता भन्दा बढी यात्रु ओसारपसार नगर्न, नगराउन यातायात व्यवसायीलाई रोक लगाएको छ। सर्वसाधारण नागरिकहरुलाई भीडभाड गरी यात्रा नगर्न अनुरोध पनि गरेको गरेसंगै सबैतिरको ब्यबसायमा असर पर्दै गएपछि ठमेलका होटलहरु पनि क्रमिक रुपमा बन्द हुने थालेका छन् ।