आज चट्याङ्ग र हावाहुरीसहित पानी पर्ने

१४ चैत्र, काठमाडौं । जल तथा मौसम पूर्वानुमान महाशाखाले शुक्रबार केही ठाउँमा चट्याङ्ग र हावाहुरी सहित पानी पर्ने सम्भावना रहेको जनाएको छ ।

पश्चिमी निम्न चापीय प्रणालीको असरले आज देशका केही ठाउँमा चट्याङ्ग र हावाहुरीसहित पानी पर्ने तथा हिमाली क्षेत्रको केही ठाउँमा हिमपातको पनि सम्भावना रहेको मौसम पुर्वानुमान महाशाखाले उल्लेख गरेको हो ।

महाशाखाका अनुसार आज मध्य र पूर्वको तुलनामा पश्चिम क्षेत्रमा धेरै पानी पर्नेछ । तर पश्चिमी निम्न चापीय प्रणाली मध्य हुँदै पूर्वमा सर्ने भएकाले दिउँसोपछि काठमाडौंसहित मध्य क्षेत्रको मौसम पनि बदली भइ चट्याङ र हावाहुरीसहित पानी पर्ने सम्भावना रहेको छ ।

यसकै प्रभावले शुक्रबार बेलुकीसम्ममा पूर्वका केही ठाउँमा पनि पानी पर्ने सम्भावना रहेको छ । यो प्रणाली पूर्व हुँदै नेपालबाट बाहिरिने भएकाले शनिबारदेखि भने मौसममा सुधार हुँदै जाने मौसमी बुलेटिनमा उल्लेख गरिएको छ ।

आगामी तीन दिनको मौसम पूर्वानुमान

चैत्र  १४ गते (शुक्रबार)

दिउँसोः देशको पश्चिमी भू-भागमा सामान्य देखि पूर्ण बदली तथा बाँकी भू-भागमा आंशिक देखि सामान्य बदलि रहनेछ। पश्चिमी  भू-भागका  केहि स्थानहरुमा र मध्य तथा पुर्वी  पहाडी भू-भागका एक वा दुई स्थानहरुमा मेघगर्जन/चट्याङ्ग तथा हावाहुरीसहित वर्षाको सम्भावना रहेको छ। हिमाली भू-भागका केहि स्थानहरुमा हल्का देखि मध्यम हिमपातको सम्भावना रहेको छ ।

रातीः देशको पश्चिमी र मध्य भू-भागमा सामान्य देखि पूर्ण बदली रही बाँकी भू-भागमा आंशिक देखि सामान्य बदलि रहनेछ। देशका केहि स्थानहरुमा मेघगर्जन/चट्याङ्ग  तथा हावाहुरीसहित वर्षाको सम्भावना रहेको छ।  हिमाली भू-भागका केहि स्थानहरुमा हल्का देखि मध्यम  हिमपातको सम्भावना रहेको छ ।

चैत्र १५ गते (शनिबार)

दिउँसोः देशको पहाडी भू-भागमा आँशिक बदली रही बाँकी भू-भागमा मौसम सामान्यतया सफा हुने देखिन्छ। पहाडी भू-भागका  एक वा दुई स्थानहरुमा अपरान्हतिर मेघगर्जन/चट्याङ्गसहित वर्षाको सम्भावना रहेको छ ।

रातीः देशको पहाडी भू-भागमा आँशिक बदली रही बाँकी भू-भागमा मौसम सामान्यतया सफा हुनेदेखिन्छ।

चैत्र १६ गते (आइतबार)

दिउँसोः देशभर मौसम सामान्यतया सफा देखि हुने देखिन्छ।

रातीः देशको पहाडी भू-भागमा आँशिक बदली रही बाँकी भू-भागमा मौसम सामान्यतया सफा देखि हुने देखिन्छ।

आगामी २४ घण्टाका लागि चेतावनी तथा परामर्श 

देशका केहि स्थानहरुमा मेघगर्जन/चट्याङ्ग तथा हावाहुरीसहित वर्षाको सम्भावना रहेको तथा हिमाली भू-भागका केहि स्थानहरुमा हल्का देखि मध्यम हिमपातको सम्भावना रहेकोले आवश्यक सतर्कता अपनाउन हुन अनुरोध छ।