अन्तर्राष्ट्रिय उडान बैशाख ३ सम्म स्थगित, अलपत्र नेपालीलाई देश छिर्ने अनुमति

१६ चैत्र, काठमाडौं । कोरोना भाइरस रोकथामसम्बन्धी गठित उच्चस्तरीय समितिले भारतका विभिन्न स्थानबाट आई सीमा क्षेत्रमा अलपत्र परेका नेपालीलाई देशभित्र पस्न अनुमति दिन सरकार समक्ष सिफारिश गरेको छ । उपप्रधानमन्त्री ईश्वर पोख्रेलको अध्यक्षतामा आज बसेको बैठकले यस्तो निर्णय गरेको हो ।

भारतीय प्रधानमन्त्री नरेन्द्र मोदीले हठात् लकडाउनको आदेश जारी गरिदिँदा विभिन्न स्थानबाट नेपाल आउन लागेका यात्रु अलपत्र परेका थिए । पछि स्थानीय प्रशासनको पहलमा उनीहरुलाई सीमावर्ती क्षेत्रमा ल्याइएपनि नेपाली सुरक्षाकर्मीले प्रवेश गर्न दिएका छैनन् ।

नेपाली भएको यथेष्ट प्रमाण भएकालाई प्रवेश दिन सिफारिश गर्दै समितिले यसरी प्रवेश गर्नेहरुलाई स्थानीय निकायले अनिवार्य रुपमा क्वारेण्टाइनमा बसाउनु पर्ने निर्णय गरेको छ । यस्तै सोही बैठकले नेपाल आउने अन्तर्राष्ट्रिय उडान आगामी बैशाख ३ गतेसम्मका लागि रोक लगाउने निर्णय गरेको छ । यसअघि चैत १८ गतेसम्मका लागि यस्ता उडान रोक्ने सरकारी निर्णय थियो ।

उच्चस्तरीय समितिले गरेका सिफारिशलाई अहिले बस्ने मन्त्रिपरिषद बैठकले अनुमोदन गर्ने तयारी छ । अहिले प्रधानमन्त्री निवास बालुवाटारमा मन्त्रिपरिषद बैठक बस्ने तयारी भइरहेको छ । मन्त्रिपरिषद बैठकले चैत २५ गतेसम्मलाई लकडाउन समेत बढाउने निर्णय गर्ने बताइएको छ ।