कोरोना भाइरस : स्वास्थ्यसँगै आर्थिक-सामाजिकमा सचेत हुन आह्वान

२२ चैत्र, एजेन्सी । विश्व स्वास्थ्य संगठनले कोरोना भाइरस महामारीमा स्वास्थ्य समस्यासँगै महामारीको सामाजिक र आर्थिक नतिजाबारेमा सचेत हुन आह्वान गरेको छ ।

अन्तराष्ट्रिय मौद्रिक कोषका प्रबन्ध निर्देशक क्रिस्टलिना जर्जिएभाको पनि उपस्थिति रहेको पत्रकार सम्मेलनमा विश्व स्वास्थ्य संगठनका निर्देशक टेड्रोस अधानोम गेब्रेससले कोरोनाले केवल स्वास्थ्य समस्या मात्रै नल्याउने भएकोले सबै देशहरुले सामाजिक र आर्थिक चुनौतीको सामना गर्ने कार्यक्रम पनि सँगसँगै लैजानुपर्ने बताए । स्वास्थ्य बचाउन थुप्रै देशहरूले लगाएका प्रतिबन्धहरूले व्यक्ति र परिवारको आम्दानी र समुदाय र देशहरुको अर्थव्यवस्थामा ठूलो क्षति पुर्याइरहेको भन्दै निर्देशक गेब्रेससले अहिले विश्वका मानिस जीवन र जीविकोपार्जनका लागि साझा संघर्षमा रहेको बताए।

उनले समाज कल्याण कार्यक्रमहरू मार्फत मानिसहरूलाई खानेकुरा र अन्य जीवनको आवश्यक चीजहरू सुनिश्चित गर्नका लागि आह्वानसमेत गरे ।तर आर्थिक क्षति कम गर्न वा थेग्न नसकेर प्रतिबन्ध हटाउन छिटो गरे भाइरस फेरि उठ्ने भएकोले त्यसको सामाजिक तथा आर्थिक प्रभाव झनै गम्भीर र लामो हुने पनि उनले चेतावनी दिए । अहिलेको महामारीबाट उत्पन्न सबै किसिमका समस्या समाधानको उपाय भनेको भाइरसलाई समझदारीको साथ आक्रमण गर्नु हो भन्दै निर्देशक गेब्रेससले प्रतिबन्धहरु, निःशुल्क उपचार र समाजकल्यणका कार्यक्रमसँगै लैजान आह्वान गरे ।

उनले यो महामारी रोक्न सबैभन्दा बढि भूमीका स्वास्थ्यकर्मीहरुको रहेकोले उनीहरुको लागि सुरक्षाका उपकरण, समयमा तलव भुक्तानी र स्वास्थ्य उपकरण किन्ने भरपर्दो कोष स्थापना गर्न पनि सबै देशहरुलाई आव्हान गरे । उनले महामारीबाट मानिसको ज्यान मात्र बचाउने नभइ उसको आर्थिक-सामाजिक अबस्था पनि बचाउन देशहरुले भूमिका खेल्नुपर्ने बताए ।यसका लागि तत्कालिन आर्थिक सहयोगका प्याकेजहरु, कर छुट र भाइरस नियन्त्रणसँगै लगानी अभिबृद्धि तथा रोजगारका ढोका खोल्ने काम गर्नुपर्ने बताए ।